Россиялик миллиардер COVID-19 билан боғлиқ вазиятни «Чернобил фалокатининг биологик варианти» деб атади

Россиялик миллиардер Олег Дерипаска (Forbes журнали унинг умумий бойлигини 2,8 миллиард долларга баҳолаган) Оқ уйнинг собиқ бош стратеги Стив Бэннондан кейин COVID-19 коронавирус пандемиясини «биологик Чернобил»га қиёслади. Бу ҳақда «РБК» хабар берган.

«Вирусдан талафот кўрган миллионлаб одамлар битта саволга бунинг қандай қилиб рўй берганига, вируснинг қаердан пайдо бўлиб қолганига жавоб топишни истайди. Улар буни билишга ҳақли деб ўйлайман. Ҳозир бутун дунёда содир бўлаётган воқеалар — Чернобил фожиасининг биологик вариантига ўхшайди», — деб ёзган Дерипаска Telegram’даги каналида.

Тадбиркор одамларда нима учун коронавирус Уханда тарқалган бўлишига қарамай Пекинда COVID-19 билан касалланганларнинг сони Нью-Йорк ёки Миландагидан камлиги борасида саволлар пайдо бўлаётганини қайд этган. Шунингдек, Дерипаска Хитой ҳукуматининг COVID-19 тарқалишига қарши чоралар кўрмагани, SARS-CoV-2 вируси ҳақидаги маълумотларни сир тутиб, унинг одамдан одамга юқиш хавфи ҳақида огоҳлантирмагани ҳам шубҳали эканини билдирган.

«Одамлар БМТ Ухандаги ‘Чернобил’да текширув ўтказса бунга умуман қаршилик қилишмайди», — дея ёзган Дерипаска.

Миллиардер Бэнноннинг Fox News каналига 19 апрелда берган интервьюсини эслатиб, унинг коронавирус тарқалиши ва «биологик Чернобил» учун бор масъулият Хитой коммунистик партияси зиммасида эканлиги ҳақида айтган фикрларига қўшилишини таъкидлаган.

«Бу жиноят. Фожиа. 40 минг нафар америкалик, Уханда вафот этган ўн минглаб, юз минглаб одамлар, Ломбардияда вирусдан ўлганлар, шифокорлар ва ҳамшираларнинг ўлимида Хитой коммунистик партияси айбдор», — деган Бэннон.

Bloomberg нашри эса Хитойнинг атайин коронавирус билан касалланганлар ҳамда у сабаб қайд этилган ўлим ҳолатларининг сонини яширганини тахмин қилган.

«Бизга маълуми шуки, вирус Уханда пайдо бўлган. Ухань шаҳрида денгиз маҳсулотлари сотиладиган бозордан бир неча миля нарида вирусология институти фаолият олиб боради», — дея Fox News’га интервью берган АҚШ давлат котиби Майк Помпео.

«Америка томонининг бу каби баёнот берган алоҳида шахслари уларнинг душмани Хитой эмас балки вирус эканини англаб етиши зарур. Уларнинг асосий вазифаси Хитойни айбдор қилиш эмас, аксинча мамлакатда эпидемияга қарши курашиш ва халқаро миқёсдаги эпидемияга қарши ҳамкорликда иштирок этиш бўлиши лозим», — дея ушбу баёнотларга жавоб қайтарган ХХР ташқи ишлар вазирлигининг расмий вакили Гэн Шуан.Аввалроқ Нобел лауреати коронавирус лаборатория шароитида яратилган бўлиши мумкинлигини айтган, Хитойдаги вирусологлар коронавирус сунъий усулда тайёрланганлиги ҳақидаги айбловга жавоб қайтариб буни инкор этганди.