Қозоғистонда коронавирус пандемияси сабаб жорий этилган карантин чоралари босқичма-босқич енгиллаштирилади, бироқ шунда ҳам санитар-эпидемиологик хавфсизлик қоидаларига қатъий риоя қилинади. Бу ҳақда мамлакат бош вазири Асқар Маминга таяниб, «РИА Новости» хабар берди.
Сўнгги маълумотларга кўра, Қозоғистонда коронавирус билан касалланиш бўйича 1949 та ҳолат қайд этилган бўлиб, 19 киши вирус оқибатида вафот этган. Қозоғистон президенти Қосим-Жўмарт Тўқаев 16 апрель куни жорий этилган фавқулодда ҳолат режимини апрель ойининг охирига қадар узайтирган эди.
«20 апрелдан бошлаб Нур-Султон ва Олмаотада карантин режими енгиллаштирилади, саноат корхоналари, қурилиш соҳаси ва айрим хизмат кўрсатиш тармоқлари ўз фаолиятини қайта йўлга қўйди. Ҳозирда улар ўз фаолиятини бошлаб юборди. Эпидемиологик вазиятдан келиб чиқиб, карантин режимини босқичма-босқич юмшатиб борамиз, бошқа корхоналар ва бизнес субъектларига ҳам ишлашига рухсат берамиз», — дейди бош вазир.
Шунингдек, Асқар Маминнинг таъкидлашича, республиканинг бошқа ҳудудларида ҳам худди шу каби ишлар амалга оширилади. Шунга қарамай, санитар-эпидемиологик хавфсизликка қатъий риоя қилиниши керак.
Эслатиб ўтамиз, Президент Шавкат Мирзиёев 20 апрель куни ўтказилган йиғилишда коронавирус аниқланмаган ҳудудларда карантин чекловларини босқичма-босқич юмшатиш юзасидан топшириқ берган эди. Республика махсус комиссияси томонидан коронавирус инфекцияси кенг тарқалишининг олдини олиш мақсадида ҳозирга қадар жорий этилган барча чекловлар 2020 йилнинг 10 майига қадар узайтирилган.
Изоҳ (0)