Қирғизистонда коронавирус билан касалланиш бўйича яна 22 та ҳолат қайд этилди. Бу ҳақда мамлакат Соғлиқни сақлаш вазирлигига таяниб, «Kloop.kg» хабар берди.
COVID-19 коронавирус инфекциясини юқтириб олиш бўйича сўнгги ҳолатлар қуйидаги ҳудудларда аниқланган:
- Бишкек шаҳри — 8;
- Ўш шаҳри — 6;
- Ўш вилояти — 3;
- Норин вилояти — 5 та.
Касалликка чалиниш ҳолатлари, асосан, Ўш вилоятида қайд этилган — 150 киши. Ундан кейинги ўринда Бишкек (123 киши) ва Жалолобод вилояти (105 киши) жойлашган. COVID-19 билан касалланиш бўйича энг кам ҳолатлар Иссиқкўл ва Боткен вилоятларида қайд этилган — мос равишда 8 ва 6 киши.
Республиканинг Талас вилоятида касалликка чалиниш бўйича бирорта ҳам ҳолат қайд этилмаган.
Айни вақтда 367 киши стационарда даволанмоқда, уларнинг 5 нафари жонлантириш бўлимида. Қирғизистонда пандемия бошланганидан буён 7 киши вафот этган, 216 кишида вирусдан даволанган.
Аввалроқ Қирғизистондаги касалхонада барча тиббиёт ходимлари коронавирусга чалингани ҳақида хабар берилганди.
Ўзбекистонда эса 21 апрель соат 10:00 ҳолатига кўра, коронавирус инфекциясини юқтириб олганлар сони 1657 кишини ташкил этмоқда. Мамлакатда 15 мартдан буён коронавирусга чалинган беморларнинг беш нафари вафот этди, 261 нафари эса соғайиб, реабилитацияга олинган. Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.
Изоҳ (0)