Коронавирусга қарши кураш учун жорий қилинган чекловларни олиб ташлаш босқичма-босқич амалга оширилиши керак, акс ҳолда касалликнинг қайта тарқалиш эҳтимоли мавжуд. Бу ҳақда Жаҳон соғлиқни сақлаш ташкилотининг Тинч океани ғарбий қисмидаги мамлакатлар бўйича минтақавий директори Такеши Касай маълум қилди, деб ёзмоқда «РБК».
Унинг сўзларига кўра, ҳали бирорта ҳам давлат вируснинг қайта тарқалишидан ҳимояланмаган. Шунинг учун чекловларни олиб ташлаш масаласини кўриб чиқаётган ҳукуматлар бунга эҳтиёткорлик билан ва босқичма-босқич ёндашиши керак.
Директорнинг маълум қилишича, чеклов чоралари пандемияга қарши курашда самара берди. Жамият эса вакцина яратилгунича ёки коронавирусни даволашнинг етарли даражадаги самарали давоси топилгунича янги шароитларда яшашга мослашиши керак. «Одамлар ва жамият янги ҳаёт тарзига тайёр бўлиши керак», — деди ЖССТ вакили.
Такеши Касайнинг қайд этишича, коронавирус хавфи бошқа касалликлар, жумладан, полиомиэлит, қизамиқ ва қизилча бўйича эмлашларга таъсир қилмаслиги керак. Акс ҳолда, соғлиқни сақлаш тизимидаги юкламаси шундай ҳам оғир бўлган Тинч океани ғарбий қисмидаги мамлакатлар янги инқирозга учраши мумкин.
Аввалроқ Хитой ва Жанубий Кореяда коронавирусга чалинганлар сони камаяётгани ҳақида хабар берилган эди. Шунингдек, Германияда карантин чораларининг қисман бекор қилиниши эълон қилинган, Испания ва Италияда бир қатор компаниялар учун карантин чоралари енгиллаштирилган, Австрия коронавирус сабаб жорий этилган чеклов чораларини бекор қилишни бошлаган. Норвегияда коронавирус сабаб ёпилган боғчалар яна очилмоқда.
Сўнгги маълумотларга кўра, айни пайтда дунё бўйича касалланганларнинг умумий сони 2 478 534 кишини ташкил этмоқда, 170 389 киши вафот этди, 645 мингдан ортиқ бемор тузалди.
Изоҳ (0)