Rossiyalik milliarder COVID-19 bilan bog‘liq vaziyatni “Chernobil falokatining biologik varianti” deb atadi

Rossiyalik milliarder Oleg Deripaska (Forbes jurnali uning umumiy boyligini 2,8 milliard dollarga baholagan) Oq uyning sobiq bosh strategi Stiv Bennondan keyin COVID-19 koronavirus pandemiyasini “biologik Chernobil”ga qiyosladi. Bu haqda “RBK” xabar bergan.

“Virusdan talafot ko‘rgan millionlab odamlar bitta savolga buning qanday qilib ro‘y berganiga, virusning qayerdan paydo bo‘lib qolganiga javob topishni istaydi. Ular buni bilishga haqli deb o‘ylayman. Hozir butun dunyoda sodir bo‘layotgan voqealar — Chernobil fojiasining biologik variantiga o‘xshaydi”, — deb yozgan Deripaska Telegram’dagi kanalida.

Tadbirkor odamlarda nima uchun koronavirus Uxanda tarqalgan bo‘lishiga qaramay Pekinda COVID-19 bilan kasallanganlarning soni Nyu-York yoki Milandagidan kamligi borasida savollar paydo bo‘layotganini qayd etgan. Shuningdek, Deripaska Xitoy hukumatining COVID-19 tarqalishiga qarshi choralar ko‘rmagani, SARS-CoV-2 virusi haqidagi ma’lumotlarni sir tutib, uning odamdan odamga yuqish xavfi haqida ogohlantirmagani ham shubhali ekanini bildirgan.

“Odamlar BMT Uxandagi ‘Chernobil’da tekshiruv o‘tkazsa bunga umuman qarshilik qilishmaydi”, — deya yozgan Deripaska.

Milliarder Bennonning Fox News kanaliga 19-aprelda bergan intervyusini eslatib, uning koronavirus tarqalishi va “biologik Chernobil” uchun bor mas’uliyat Xitoy kommunistik partiyasi zimmasida ekanligi haqida aytgan fikrlariga qo‘shilishini ta’kidlagan.

“Bu jinoyat. Fojia. 40 ming nafar amerikalik, Uxanda vafot etgan o‘n minglab, yuz minglab odamlar, Lombardiyada virusdan o‘lganlar, shifokorlar va hamshiralarning o‘limida Xitoy kommunistik partiyasi aybdor”, — degan Bennon.

Bloomberg nashri esa Xitoyning atayin koronavirus bilan kasallanganlar hamda u sabab qayd etilgan o‘lim holatlarining sonini yashirganini taxmin qilgan.

“Bizga ma’lumi shuki, virus Uxanda paydo bo‘lgan. Uxan shahrida dengiz mahsulotlari sotiladigan bozordan bir necha milya narida virusologiya instituti faoliyat olib boradi”, — deya Fox News’ga intervyu bergan AQSh davlat kotibi Mayk Pompeo.

“Amerika tomonining bu kabi bayonot bergan alohida shaxslari ularning dushmani Xitoy emas balki virus ekanini anglab yetishi zarur. Ularning asosiy vazifasi Xitoyni aybdor qilish emas, aksincha mamlakatda epidemiyaga qarshi kurashish va xalqaro miqyosdagi epidemiyaga qarshi hamkorlikda ishtirok etish bo‘lishi lozim”, — deya ushbu bayonotlarga javob qaytargan XXR tashqi ishlar vazirligining rasmiy vakili Gen Shuan.Avvalroq Nobel laureati koronavirus laboratoriya sharoitida yaratilgan bo‘lishi mumkinligini aytgan, Xitoydagi virusologlar koronavirus sun’iy usulda tayyorlanganligi haqidagi ayblovga javob qaytarib buni inkor etgandi.