Маккадаги Ал-Ҳаром ва Мадинадаги Набавий Масжиди Рамазон ойида ҳам ёпиқ бўлади. Бу ҳақда Саудия Арабистонининг икки муқаддас масжид ишлари бўйича бош бошқармасига таяниб, «РИА Новости» хабар берди.
«Икки муқаддас масжиднинг очилиши коронавирус тарқалишига қарши кураш чоралари доирасида Рамазон ойида ҳам очилмайди», — дейилади хабарда.
Мусулмонлар ҳар йилги анъаналардан фарқли равишда жорий Рамазон ойида ушбу масжидларда жамоатчилик ва таровеҳ намозларини ўқий олмайди.
Эслатиб ўтамиз, Ал-Ҳаром ва Набавий Масжидда жамоат намозлари ўқилиши 20 мартда тўхтатилган эди. Февраль охирида Саудия Арабистони расмийлари Макка шаҳрида Умра амалини бажариш ва Мадинада Набавий Масжидни зиёрат қилиш учун келадиган фуқароларнинг мамлакатга киришини вақтинча тўхтатиб қўйганди. Маккада коронавирус туфайли зиёратчиларнинг Каъба атрофидаги майдонга ўтиши вақтинча чекланган.
Куни кеча Саудия Арабистони Уламолар кенгаши бутун дунёдаги мусулмонларни Рамазон ойи давомида барча намозларни, жумладан, таровеҳ намозини ҳам уйда ўқишга чақирди. Ўзбекистон мусулмонлари идораси ҳам Рамазон ойини ўтказиш ҳақидаги баёнотида худди шу каби тавсияни берган.
Маълумот учун, Ўзбекистонда Рамазон ойи 24 апрелдан бошланади.
Изоҳ (0)