Коронавирусга қарши кураш штаби: «Ўзбекистон коронавирус бўйича исталган воқеалар ривожига тайёр»

Коронавирусга қарши кураш штаби Ўзбекистон коронавирус инфекциясининг тарқалиши бўйича исталган воқеалар ривожига тайёрлиги таъкидланди.

Бу ҳақда 21 апрель куни АОКА ҳузурида ташкил этилган штабдаги брифингда Коронавирусга қарши кураш штаби аъзоси Ҳабибулла Оқилов маълум қилди.

Жумладан, фуқаролар томонидан Ўзбекистонда инфекцияга чалинган беморлар учун қанча шифо ўринлари (койкалар) ташкил этилгани, соғлиқни сақлаш тизимининг тайёргарлиги, тиббиёт ходимлари борасидаги саволга тўхталиб ўтилди.

Ҳозирги кунда Республика махсус комиссияси коронавирус бўйича вазият ривожланишининг турли эҳтимолий талқинларига ҳозирланаётганиШу жумладан, шифохоналарда биринчи, иккинчи, учинчи тартибда шифо ўринларининг (койкалар) етарлича захираси яратилгани, дори-дармон, ҳимоя ва дезинфекция воситалари захираси борлиги, керакли тиббиёт ускуналари, шу жумладан, сунъий нафас олдириш аппаратлари харид қилинаётганлиги айтилди.Барча ихтисосликдаги шифокорлар ва ўрта тиббиёт ходимларининг коронавирус шароитида ишлаш учун онлайн таълим олиш жараёни давом этаётганлиги ҳам қўшимча қилинди.

Эслатиб ўтамиз, Республика махсус комиссияси томонидан коронавирус инфекцияси кенг тарқалишининг олдини олиш мақсадида жорий этилган барча чекловлар 2020 йилнинг 10 майига қадар узайтирилган. Республика махсус комиссияси карантин даври учун янги тартибларни эълон қилди.

Ўзбекистонда 15 мартдан буён коронавирусга чалинган беморларнинг беш нафари вафот этди, 261 нафари эса соғайиб, реабилитацияга олинган. Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.