Ўзбекистонда хусусий тиббиёт ташкилотлари ҳозирча коронавирус таҳлилини ўтказиш жараёнига жалб этилмаслиги маълум қилинди. Бу ҳақда 21 апрель куни АОКА ҳузурида ташкил этилган штабдаги брифингда Коронавирусга қарши кураш штаби аъзоси Ҳабибулла Оқилов хабар берган.
Аввалроқ нодавлат тиббиёт ташкилотларига барча талабларга риоя қилган ҳолда 2020 йил 1 сентябргача коронавирус инфекциясини лаборатор текшириш бўйича пуллик тиббий хизмат кўрсатишларига рухсат берилиши айтилган эди.
Оқилов фуқароларнинг ушбу тестлар қай тартибда ўтказилиши, экпресс-тестлар, айни тестларнинг аниқлик даражаси неча фоизни ташкил этишига доир саволларига изоҳ берган.
Жумладан, штаб аъзоси хусусий тиббиёт ташкилотларига таҳлил ўтказиш учун рухсат берилиши борасида Республика махсус комиссияси томонидан кўриб чиқилганини маълум қилди. Бироқ таҳлиллар асосида Соғлиқни сақлаш вазирлиги ва Санитария-эпидемиологик осойишталик агентлигининг лаборатория таҳлилларини ўтказиш имкониятлари етарли эканлиги аниқланганини билдирди. Хулосага кўра, ҳозирги кунда коронавирус инфекциясини аниқлаш борасида таҳлил ўтказиш жараёнига хусусий тиббиёт ташкилотларини жалб этишга ҳожат йўқлиги айтилган.Айни пайтда полимер занжир реакцияси (ПЗР) ёрдамида лаборатор текшириш ўтказилаётгани, унинг ўзига хослиги, сезгирлиги ва аниқлиги даражаси энг юқори эканлиги таъкидланди. Шу билан бирга, экспресс тестлар ўтказилмаётганлиги айтилди.
Изоҳ (0)