Uzbekistan Airways йўловчи самолётлари юк ташувчи самолётларга айлантирилади

Uzbekistan Airways йўловчи самолётлари юк ташувчи самолётларга айлантирилади. Бу ҳақда компания матбуот хизмати маълум қилди.

Қайд этилишича, юк ташишга ортиб бораётган талабни қондириш, шунингдек, йўловчи қатновлари бутунлай тўхтатилгани муносабати билан Uzbekistan Airways АЖ бошқаруви томонидан вақтинчалик сақланиб турган Boeing-767-300-ER самолётларини Boeing-767-300-PTC юк ташувчи самолёт турига айлантиришга қарор қилинган.

Ушбу жараён салонлардан йўловчи ўриндиқларини олиб ташлаш ва бўшаган жойлардан юкларни ташишда фойдаланишни ўз ичига олади. Бу эса юқори палубага қўшимча 20 тоннагача юк ортиш ва тақдим этиладиган тижорат юклари умумий ҳажмини 180 кубометрга ошириш имконини беради.

Таъкидланишича, юк самолётига айлантириш жараёни Uzbekistan Airways Technicс кучлари томонидан барча талабларга риоя этилган ҳолда Boeing компаниясининг ҳужжатларига мувофиқ амалга оширилган.

Ушбу самолётларнинг дастлабки вариантини тижорий мақсадда ишга тушириш 21 апрель кунига режалаштирилган.

Эслатиб ўтамиз, Ўзбекистонда коронавирус сабаб халқаро йўналишларда йўловчи ташиш 20 мартдан бошлаб 40 кун муддатга тўхтатилганди.