«Ўзгидромет» хабарига кўра, бу ҳафтада ҳам Ўзбекистонга Эрондан иссиқ ва қуруқ ҳаво оқими кириши давом этади.
Душанбадан жумагача жанубий оқим кучаяди, яъни иссиқ ҳаво республика ҳудудини қамраб олади.
Ўзбекистон ҳудудининг катта қисмида ҳаво вақти-вақти билан ўзгариб туради, ёғингарчилик бўлмайди. Ҳарорат кечаси 17-22 даража атрофида, 20—22 апрель кунлари кундузи 25-30 даража, 23—24 апрель кунлари 27-32 даража, жанубда ва чўл зонасининг айрим жойларида 33-34 даража иссиққача кўтарилади, бундай ҳароратлар шу давр учун хос бўлган меъёрий қийматлардан 6-8 даражага юқоридир.
Хабарда қайд этилишича, апрелнинг шу кунлари учун максимал ҳарорат рекордлари 32-34 даражани, жануб ва чўл зоналарида эса 35-37 даражани ташкил қилади.
Фақат республиканинг шимолий ҳудудларига ҳафтанинг иккинчи ярмида ғарбий Қозоғистондан нисбатан салқин ва кам нам ҳаво оқими киришни бошлайди. 23 апрель куни Қорақалпоғистоннинг айрим жойларида қисқа муддатли ёмғир ёғиши мумкин. Ҳарорат пасайиб, 24 апрель куни кечаси 7-12, кундузи 17-22 даража илиқ бўлади.
Изоҳ (0)