«Фуқароларнинг ўзини ўзи бошқариш органлари тўғрисида»ги Ўзбекистон Республикаси қонуни лойиҳаси Норматив-ҳуқуқий ҳужжатлар лойиҳалари муҳокамаси порталига муҳокама учун жойлаштирилди.
Ушбу қонун лойиҳасида фуқаролар йиғинининг раиси (оқсоқоли)ни сайлаш муддати уч йилдан беш йил муддатга алмаштирилиши белгиланган.
Амалиётда қўлланиб келинган, бироқ қонунчиликда акс этмаган бир қатор тушунчалар, хусусан, қонун лойиҳасида кўчабоши — фуқаролар йиғини ҳудудидаги кўчаларнинг географик жойлашувига қараб, аҳолининг умумий йиғилишида сайланган ва улар номидан фуқаролар йиғинида фаолият олиб борадиган, уларнинг қонуний манфаатларини ифода этадиган фуқаро сифатида, уйбоши — фуқаролар йиғини ҳудудидаги кўп квартирали уйларнинг географик жойлашувига қараб, аҳолининг умумий йиғилишида сайланган ва улар номидан фуқаролар йиғинида фаолият олиб борадиган, уларнинг қонуний манфаатларини ифода этадиган фуқаро дея таърифланган.
Эслатиб ўтамиз, 2020 йил 18 февралда Ўзбекистон Президентининг «Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида»ги фармони қабул қилинган, мазкур ҳужжат билан фуқаролар йиғини раиси ўринбосари — ижтимоий ва маънавий-маърифий масалалар бўйича маслаҳатчи, фуқаролар йиғини раиси ўринбосари — тадбиркорлик, томорқа ер эгалари фаолиятига кўмаклашиш ва ободонлаштириш ишлари бўйича маслаҳатчи, фуқаролар йиғини раиси ўринбосари — ёшлар масалалари бўйича маслаҳатчи, фуқаролар йиғини раиси ўринбосари — кексалар ва фахрийлар ишлари бўйича маслаҳатчи лавозимлари тугатилган ҳамда фуқаролар йиғини раисининг ҳуқуқ-тартибот масалалари бўйича ўринбосари, фуқаролар йиғини раисининг оила, хотин-қизлар ва ижтимоий-маънавий масалалар бўйича ўринбосари, фуқаролар йиғини раисининг ободонлаштириш, томорқа ва тадбиркорлик масалалари бўйича ўринбосари, оила ва хотин-қизлар масалалари бўйича мутахассис, фуқаролар йиғини раисининг ёшлар масалалари бўйича маслаҳатчиси, фуқаролар йиғини раисининг кексалар ва фахрийлар ишлари бўйича маслаҳатчиси лавозимлари тузилмага киритилганди.
Қонун лойиҳасининг 20, 21 ва 22-моддаларида уларнинг ваколатлари, ҳуқуқлари ва мажбуриятлари келтириб ўтилган.
Қонун лойиҳасининг матнида «фуқаролар йиғини» тузилма сифатида, «фуқаролар йиғини кенгаши» эса фуқаролар йиғинининг коллегиал органи сифатида қўлланилмоқда.
Аввалроқ Ўзбекистон Маҳалла ва оилани қўллаб-қувватлаш вазирлиги ҳузуридаги «Маҳалла ва оила» илмий-тадқиқот институтининг фаолиятини ташкил этиш режалаштирилаётгани хабар қилинганди.
Изоҳ (0)