Самарқандда коронавирусга чалинган фуқаролар 14 нафарга етди. Бу ҳақда «Дарё»га вилоят соғлиқни сақлаш бошқармаси ахборот хизмати маълум қилмоқда.
2020 йилнинг 18 апрель соат 18:30 ҳолатига кўра, вилоятда коронавирус инфекциясига чалинганлар сони яна 6 нафарга ошган ва 14 нафарни ташкил қилган.
«Ҳозирда, ушбу инфекцияга чалинган беморларнинг умумий аҳволи яхши. Шифокорлар ва мутахассислар томонидан назорат остида бўлган барча беморлар белгиланган стандартлар бўйича даволанмоқда», — дейилади бошқарма ахборот хизмати хабарида.
Қўшимча қилинишича, вилоятда айни кунда жами 4065 нафар фуқаро карантинга олинган. Шундан 647 нафари стационар шароитидаги тиббий кузатув остида.
Эслатиб ўтамиз, 19 апрель соат 10:00 ҳолатига кўра, Ўзбекистонда коронавирус инфекциясини юқтириб олганлар сони 1495 нафарни ташкил этмоқда. Республика махсус комиссияси томонидан 20 апрелга қадар жорий этилган чекловчи тадбирлар (карантин) ҳамда коронавирус инфекцияси тарқалишига қарши кучайтирилган тартиб 10 майга қадар узайтирилди.
Изоҳ (0)