Samarqandda koronavirusga chalingan fuqarolar 14 nafarga yetdi. Bu haqda “Daryo”ga viloyat sog‘liqni saqlash boshqarmasi axborot xizmati ma’lum qilmoqda.
2020-yilning 18-aprel soat 18:30 holatiga ko‘ra, viloyatda koronavirus infeksiyasiga chalinganlar soni yana 6 nafarga oshgan va 14 nafarni tashkil qilgan.
“Hozirda, ushbu infeksiyaga chalingan bemorlarning umumiy ahvoli yaxshi. Shifokorlar va mutaxassislar tomonidan nazorat ostida bo‘lgan barcha bemorlar belgilangan standartlar bo‘yicha davolanmoqda”, — deyiladi boshqarma axborot xizmati xabarida.
Qo‘shimcha qilinishicha, viloyatda ayni kunda jami 4065 nafar fuqaro karantinga olingan. Shundan 647 nafari statsionar sharoitidagi tibbiy kuzatuv ostida.
Eslatib o‘tamiz, 19-aprel soat 10:00 holatiga ko‘ra, O‘zbekistonda koronavirus infeksiyasini yuqtirib olganlar soni 1495 nafarni tashkil etmoqda. Respublika maxsus komissiyasi tomonidan 20-aprelga qadar joriy etilgan cheklovchi tadbirlar (karantin) hamda koronavirus infeksiyasi tarqalishiga qarshi kuchaytirilgan tartib 10-mayga qadar uzaytirildi.
Izoh (0)