Ўзбекистон Россияга гуманитар ёрдам сифатида 5 миллион дона тиббий ниқоб, шунингдек, тиббиёт докасини юборади. «Интерфакс»нинг Россия бош вазири ўринбосари Алексей Оверчукка асосланиб хабар беришича, 18 апрель куни ушбу ёрдам юкининг биринчи навбати Москвага етказилган.
Оверчукнинг қайд этишича, «қабул қилиб олинган тиббиёт буюмлари биринчи галда пандемияга қарши олдинги сафларда туриб кураш олиб бораётганларга йўналтирилади». «Биз учун жуда муҳим бўлган ушбу кўмак учун Ўзбекистон халқи ва ҳукуматига энг илиқ тилакларни билдириб қоламиз», — деди Оверчук.
Маълумот учун, 18 апрель Тошкент вақти билан 23:00 ҳолатига кўра Россияда салкам 37 минг кишида коронавирус инфекцияси аниқланган, беморларнинг 313 нафари вафот этган, 3 057 нафари эса соғайишга муваффақ бўлган.
Аввалроқ «Ўзтўқимачиликсаноат» уюшмаси раиси Илҳом Ҳайдаров 2 апрель куни қилган чиқишида Ўзбекистон бир ой ичида ҳимоя ниқобларини ишлаб чиқариш ҳажмини кунлик 200 минг донадан 2,5 миллион донагача ошира олгани, кейинги бир ҳафта ичида ишлаб чиқариш ҳажми 5 миллион донага етказилиши айтиб ўтган эди.
Худди шу куни Фармацевтика тармоғини ривожлантириш агентлиги директори Сардор Кариев 1 март ҳолатига Ўзбекистонда кунлик ниқоб ишлаб чиқариш қуввати 450—500 минг донани ташкил этгани, 1 апрелга келиб ниқоб ишлаб чиқарувчи корхоналар сони 190 тага етиб, умумий қувват 4,3 миллион донага кўтарилганини айтган эди.
Президент Шавкат Мирзиёев эса 26 март куни бўлиб ўтган видеоселектор йиғилишида тиббиёт ниқоблари ишлаб чиқаришни кунига 5 миллион донага етказиш бўйича топшириқ берган эди.
Эслатиб ўтамиз, Ўзбекистон бунгача коронавирус пандемияси сабаб Озарбайжон, Венгрия, Беларусь, Хитой, Эрон, Қирғизистон, Тожикистон ва Афғонистонга ҳам гуманитар ёрдам юкларини юборган эди.
Изоҳ (0)