«Ўздонмаҳсулот» компанияси тизими корхоналари томонидан ишлаб чиқарилган бир қоп ун учун 125 минг сўм қилиб белгиланди, айни вақтда унни биржа савдоларисиз, тўғридан-тўғри шартномалар билан сотиш тартиби жорий этилади. Бу ҳақда компания матбуот хизмати «Дарё»га маълум қилди.
Хабар беришларича, Вазирлар Маҳкамасида 16 апрель куни Коронавирус пандемияси шароитида республика аҳолисини давлат ресурлари ҳисобига ун маҳсулотларини тизимли ва кафолатли етказиб бериш масалаларига бағишланган йиғилиш ўтказилган.
Йиғилишда коронавирус пандемияси шароитида юзага келган вазиятни инобатга олиб, барча ҳудудларга бир маромда ун етказиб берилишини таъминлаш мақсадида, маҳсулотни биржа савдоларисиз, тўғридан-тўғри шартномалар билан сотиш бўйича бўйича топшириқ берилган.
Шунингдек, ҳукумат топшириғига асосан «Ўздонмаҳсулот» корхоналарида ишлаб чиқарилган бир қоп ун учун 125 минг сўм қилиб белгиланган. Қайд этишларича, ун маҳсулотлари нархларининг шаклланиши солиқ ва ҳуқуқни муҳофаза қилиш органлари томонидан қатъий назоратга олинган.
«Ўздонмаҳсулот» вакилларининг «Дарё»га маълум қилишича, бугунги кунда уннинг биржа савдолари орқали сотилиши маҳсулотнинг асосий қисми Ўзбекистоннинг чекка ҳудудларига етиб бормай, шаҳар ҳамда туман марказларида қолиб кетишига сабаб бўлаётган эди.
«Янги жорий этилган тартибда эса уннинг олиб-сотарлар томонидан қўлдан қўлга ўтказилиши оқибатида нархи сунъий тарзда ўсиб кетишининг ҳам олди олинади», — дейди компания вакиллари.Маълумот учун, ҳозирда «Ўздонмаҳсулот» корхоналари тасарруфидаги 52 та тегирмон цехларида ҳар куни 6 минг тоннадан ортиқ ун ишлаб чиқарилмоқда. Корхоналар омборларида 32 минг тоннадан ортиқ ун захираси бор ва эҳтиёждан келиб чиқиб, ишлаб чиқариш хажмини ошириш имкониятлари мавжуд. Дон захираси ҳам етарли миқдорда.
Изоҳ (0)