Нарх ошиши бўйича норозилик мурожаатларининг асосий қисми қайси вилоятлардан эканлиги айтилди

Карантин даврида фуқароларнинг нарх-наво масаласида келиб тушаётган норозилик мурожаатларининг энг кўпи Қашқадарё вилоятидан эканлиги маълум бўлди. «Дарё» мухбирининг хабар беришича, бу ҳақда 19 апрель куни Ахборот ва оммавий коммуникациялар агентлигидаги брифингда Бош прокуратура ҳузуридаги Иқтисодий жиноятларга қарши курашиш департаменти бўлим бошлиғи Фарҳод Очилов томонидан айтилган.

Озиқ-овқат маҳсулотлари ва тиббий гигиена воситаларининг нарх-навоси ошиб кетганидан норози бўлиб, шу кунга қадар департаментнинг ишонч телефонлари ва веб-сайтларига жами 834 та мурожаат келиб тушгани билдирилди. Ушбу мурожаатларнинг асосий қисми:

• Қашқадарё (132 та)
• Самарқанд (103 та)
• Наманган ва Жиззах (74 тадан)
• Сурхондарё (71 тадан)
• Тошкент шаҳрига (84 та) тўғри келиши айтилди.

Департамент бошлиғининг топшириғига мувофиқ, нарх-наво билан боғлиқ келиб тушган мурожаатлар зудлик билан, алоҳида ҳолларда эса 2 кунлик муддатда жойига чиқиб ўрганиш тартиби жорий этилган. Бунинг натижасида, келиб тушган мурожаатларнинг 819 таси ёки 98 фоизи кўриб чиқилиши таъминлангани билдирилди. Натижаларга кўра, 256 та мурожаат бўйича нархларнинг ошишига сабаб бўлаётган омиллар ўрганилиб 103 та ҳолатда истеъмол бозорини арзон маҳсулотлар билан тўлдириш, 71 та ҳолатда маҳаллаларда арзонлаштирилган ярмаркалар ташкил этиш, нархларни асоссиз оширган 28 нафар ҳуқуқбузарларнинг эса маъмурий жавобгарлик ишлари юритилиши таъминланган.

Шу билан бирга, текширувлар натижасига кўра, мурожаатларнинг 563 таси ёки 67,5 фоизи ўз тасдиғини топмаган. Бу эса ҳар бир ходим ва унинг вақти ҳисобда турган бир шароитда куч ва воситалардан бесамар фойдаланишга сабаб бўлаётганлиги таъкидланди.

Эслатиб ўтамиз, март ойи ўрталарида Давлат солиқ қўмитаси вакили нархларни атайлаб ошираётган савдогарлар борлигидан огоҳлантирган эди.

Ундан аввалроқ эса Ўзбекистондаги тадбиркорлардан коронавирус карантини шароитида нархларни оширмаслик ҳақида кафолат хати олинаётгани маълум қилинган.