Narx oshishi bo‘yicha norozilik murojaatlarining asosiy qismi qaysi viloyatlardan ekanligi aytildi

Karantin davrida fuqarolarning narx-navo masalasida kelib tushayotgan norozilik murojaatlarining eng ko‘pi Qashqadaryo viloyatidan ekanligi ma’lum bo‘ldi. “Daryo” muxbirining xabar berishicha, bu haqda 19-aprel kuni Axborot va ommaviy kommunikatsiyalar agentligidagi brifingda Bosh prokuratura huzuridagi Iqtisodiy jinoyatlarga qarshi kurashish departamenti bo‘lim boshlig‘i Farhod Ochilov tomonidan aytilgan.

Oziq-ovqat mahsulotlari va tibbiy gigiyena vositalarining narx-navosi oshib ketganidan norozi bo‘lib, shu kunga qadar departamentning ishonch telefonlari va veb-saytlariga jami 834 ta murojaat kelib tushgani bildirildi. Ushbu murojaatlarning asosiy qismi:

• Qashqadaryo (132 ta)
• Samarqand (103 ta)
• Namangan va Jizzax (74 tadan)
• Surxondaryo (71 tadan)
• Toshkent shahriga (84 ta) to‘g‘ri kelishi aytildi.

Departament boshlig‘ining topshirig‘iga muvofiq, narx-navo bilan bog‘liq kelib tushgan murojaatlar zudlik bilan, alohida hollarda esa 2 kunlik muddatda joyiga chiqib o‘rganish tartibi joriy etilgan. Buning natijasida, kelib tushgan murojaatlarning 819 tasi yoki 98 foizi ko‘rib chiqilishi ta’minlangani bildirildi. Natijalarga ko‘ra, 256 ta murojaat bo‘yicha narxlarning oshishiga sabab bo‘layotgan omillar o‘rganilib 103 ta holatda iste’mol bozorini arzon mahsulotlar bilan to‘ldirish, 71 ta holatda mahallalarda arzonlashtirilgan yarmarkalar tashkil etish, narxlarni asossiz oshirgan 28 nafar huquqbuzarlarning esa ma’muriy javobgarlik ishlari yuritilishi ta’minlangan.

Shu bilan birga, tekshiruvlar natijasiga ko‘ra, murojaatlarning 563 tasi yoki 67,5 foizi o‘z tasdig‘ini topmagan. Bu esa har bir xodim va uning vaqti hisobda turgan bir sharoitda kuch va vositalardan besamar foydalanishga sabab bo‘layotganligi ta’kidlandi.

Eslatib o‘tamiz, mart oyi o‘rtalarida Davlat soliq qo‘mitasi vakili narxlarni ataylab oshirayotgan savdogarlar borligidan ogohlantirgan edi.

Undan avvalroq esa O‘zbekistondagi tadbirkorlardan koronavirus karantini sharoitida narxlarni oshirmaslik haqida kafolat xati olinayotgani ma’lum qilingan.