Жаҳон соғлиқни сақлаш ташкилоти Россияда ва бошқа бир нечта давлатларда коронавируснинг тарқалиши билан боғлиқ вазиятдан хавотирда. Бу ҳақда ташкилотнинг Европадаги минтақавий бюроси директори Ханс Клюге баёнотига таяниб, «РИА Новости» хабар берган.
Ташкилот вакили Европанинг айрим давлатларида, жумладан, Германия, Италия, Испания ва Францияда вазият ижобий томонга ўзгарганини қайд этган.
«Бироқ бир нечта давлатлардаги ижобий жиҳатлар билан бир қаторда бошқа мамлакатлар, хусусан, Буюк Британия, Украина, Туркия, Беларусь ва Россияда вазият оғирлашмоқда», — деган Клюге. ЖССТ вакили кейинги ҳафта Европада янада оғир ўтиши ва қитъа учун муҳим давр бўлишини таъкидлаган.
Клюге турли мамлакатларда белгиланган тартибга риоя қилаётганларнинг ҳаммасига миннатдорлик билдирган ва байрам кунларида ҳам карантин қоидаларига риоя этишга чақирган.
«Баҳор об-ҳавоси ҳукмронлик қилаётган бўлса ҳам кучли бўронда қолиб кетганмиз. Айрим давлатларда COVID-19 билан хасталанганлар сони камаяётган бўлса, баъзи мамлакатларда оғир дамлар яқинлашмоқда», — дея қўшимча қилган ЖССТнинг Европадаги вакили.
Амалдор мамлакатларни бир-бирларидан ўрганиш ва ўзаро бамаслаҳат иш кўришга чақирди. Айниқса, эпидемия билан курашиш мақсадида белгиланган чеклов меъёрларини бекор қилишда ёки юмшатишда шошилмасликни сўради.
«Ушбу ҳолатда бирдам бўлиш энг асосий жиҳатлардан бири эканини унутмаслик керак», — дея гапларига якун ясаган Крюге.COVID-19 коронавируси пандемияси дунёнинг кўплаб мамлакатларида давом этмоқда. Жаҳон соғлиқни сақлаш ташкилоти маълумотига кўра бутун дунёда коронавирус юқтириб олганлар сони 2 миллион нафардан ошиб кетган, тахминан 126 минг киши касалликдан вафот қилган. Коронавирус сабаб вафот этганлар сони бўйича АҚШ етакчилик қилмоқда, ундан кейинги ўринларда Италия, Испания ва Франция бормоқда.
Мавзуга доир:
Изоҳ (0)