Тошкентда карантин қоидаларига амал қилмасдан жамоат жойида ниқобсиз ва маст ҳолда юрган фуқарога 15 сутка маъмурий қамоқ жазоси тайинланди. Бу ҳақда «Дарё»га Олий суд матбуот хизмати хабар берди.
Маълум бўлишича, 6 апрель куни 38 ёшли А.Т. Чилонзор тумани, «Чўпонота» маҳалласида маст ҳолда қўлида спиртли ичимлик шишаси билан ниқобсиз юрганлиги сабабли ИИО ходимлари келиб, уни туман ИИБ бўлимига олиб кетишмоқчи бўлганида уларга қаршилик кўрсатиб, ИИО ходимларининг қонуний талабларини бажармаган.
Туман ИИБ бўлимига етиб келгач, А.Т. бўлимга олиб келинган бошқа шахслар ва ИИО ходимларига ҳақоратомуз шилқимлик қилиб, майда безорилик содир этган. Қоидабузарлик бўйича ҳуқуқбузар А.Т.га нисбатан маъмурий баённома расмийлаштирилиб, судга оширилган.
А.Т. маст ҳолда ниқобсиз юрганлиги, аммо ўта маст ҳолга келганлиги сабабли ИИО ходимлари уни олиб кетишганлиги ва туман ИИБда бўлган воқеаларни эслай олмаслигини, қилган ишидан чин кўнгилдан пушаймонлигини, бошқа бундай ҳолатлар такрорланмаслигини, суддан унга нисбатан енгиллик беришини сўраган.
Чилонзор туман маъмурий судининг 13 апрелдаги қарорига кўра, А.Т. Маъмурий жавобгарлик тўғрисидаги кодекснинг 54-моддаси 1-қисми (Эпидемияларга қарши кураш қоидаларини бузиш), 187-моддаси 2-қисми (Жамоат жойларида алкоголь маҳсулотини истеъмол қилиш), 183-моддаси («Такроран жамоат жойларида алкоголь маҳсулотини истеъмол қилиш»), 194-моддаси (Ички ишлар органлари ходимининг қонуний талабларини бажармаслик) 1-қисми билан айбли деб топилиб, унга 15 сутка қамоқ жазоси тайинланган.
Аввалроқ Самарқандда ҳам худди шундай ҳуқубузарлик содир этган шахс 15 суткага қамалганди. Сирдарёда профилактика инспекторини ҳақорат қилган велосипедда юрган маст фуқаро 15 суткага қамалган. Шунингдек, ички ишлар органларининг карантинда олиб бораётган ишларини масхара қилган ҳолатлар ҳам учраган. Профилактика инспекторининг погонини юлиб, хизмат кийимини йиртиб ташлаган аёлга эса жиноий иш қўзғатилган. Ўзбекистонда карантин қоидалари энг кўп бузилаётган вилоятлар орасида Тошкент етакчилик қилмоқда.
Изоҳ (0)