«Маҳаллаларда вирус юқмайдиган ва юқтирмайдиган ‘супермен’лар ишласа керак». Депутат Кушербаев уйма-уй юриб, томорқа текшираётганларни танқид қилди

Олий Мажлис Қонунчилик палатаси депутати Расул Кушербаев томорқаларни текшириш баҳонасида карантин қоидаларини бузаётганларни жавобгарликка тортишга чақирди.

Бугунги куннинг энг мантиқсиз ва кулгули ҳолати.

Менимча, маҳаллада одамлармас, вирус юқмайдиган ва юқтирмайдиган ‘супермен’ ёки ‘ледимен’лар ишласа керак.

Карантин қоидаларига риоя этиш талаб қилиниб, уйда қолиш сўралаётган бир вақтда маҳаллаларнинг масъул ходимлари уйда қолганларнинг уйига кириб атрофни ўрганмоқда (албатта, ўз хоҳиши билан эмас): нечта дарахт бор, нима экилган, нега экилмаган, мана огоҳлантириш ва ҳоказо.

‘Уйда қол, бегонани киритма, касалликдан сақлан’, деган гаплардан маҳалла ходимларини шу ишга буюраётган масъулларнинг хабари йўқ кўринади. Балки умуман билишмас...

Томорқачиликнинг тарғиботи билан масофавий шуғулланиш мумкин-ку.

Айни вақтда бундай кулгили топшириқ бераётганларнинг ҳаракати карантин талабларини инкор этиш сифатида баҳоланиб, бошқалар қатори тенг жавобгарликка тортилиши шарт.

Расул Кушербаев, Олий Мажлис Қонунчилик палатаси депутати 

Аввалроқ ЎзЛиДеП вакили, ҳуқуқшунос Нуриддин Муродов Маъмурий жавобгарлик кодексида томорқадан фойдаланиш тартибини бузганлик учун жарима жазосини қўллаш бўйича таклиф аҳоли томонидан ҳақли эътирозларга сабаб бўлаётганини маълум қилганди.Эслатиб ўтамиз, 13 апрель куни Ўзбекистонда томорқа ер участкаларидан самарали фойдаланмаганлик учун жавобгарлик кучайтирилиши бўйича ҳужжат қабул қилингани тўғрисида хабар берилганди. Унга кўра мамлакатда томорқа ерлардан унумли фойдаланмаган фуқаролар жаримага тортилади. Таъкидланишича, Олий Мажлис Қонунчилик палатаси депутатлари ҳудудларга чиқиб аҳолининг томорқа ерлардан фойдаланиш ҳолатларини таҳлилий ўрганмоқда. Ўрганишларда кўплаб аҳоли ўз экин майдонларидан имкон қадар унумли фойдаланаётган бир пайтда айрим фуқаролар томорқаларини ўз ҳолига ташлаб қўйгани аниқланган.