«Дарё» мухбирининг хабар беришича, АОКА ҳузурида ташкил этилган штабдаги брифингда Ички ишлар вазири матбуот котиби Шоҳрух Ғиёсов махсус стикерсиз ҳаракатланиши мумкин бўлган автотранспорт воситаларига тааллуқли айрим жиҳатлар ҳақида гапириб ўтди.
Маълумки, уйда ўтирган фуқароларнинг касалхонага бориши зарур бўлса, тез ёрдам машинасини чақиртириш тавсия этилган эди.
«Бу ҳолатни қатъий тартибга солиш имкони бўлмаганлиги учун фуқаронинг ёнида касалхонага бориш зарурати туғилган бирор-бир ҳужжат бўлиши керак. Агар ҳақиқатан ҳаётга хавф туғдирадиган ҳолат бўлса, хизмат олиб бораётган ходимлар ҳам фуқарога ёрдам беради», — дейди Шоҳрух Ғиёсов.
Йўловчи ташиш фаолияти билан шуғулланиш лицензиясига эга бўлган йўналишсиз таксилар (бунга шахсий автотранспорт ҳам киради) ўзларининг рўйхатдан ўтган маъмурий ҳудуди доирасида ва йўловчиларсиз фақат етказиб бериш хизматини кўрсатиш мақсадида ҳаракатланиши мумкинлиги айтилган. Бу тоифадаги ҳайдовчилар ўзлари билан йўловчи ташиш ҳуқуқи бўлган лицензиясини ҳамда курьерлик хизматидан ишга жалб этилганлиги ҳақида маълумотнома олиб юришлари шартлиги белгиланган. Ўта зарур ҳолатда, яъни инсон ҳаётига хавф туғдирадиган ҳолатларда ва кечиктириб бўлмайдиган тиббиёт муолажаларини олаётган бемор йўловчиларни ташиш мумкин.
Коммунал хизмат кўрсатувчи ташкилотларнинг хизмат ва махсус автотранспорт воситаларида ҳайдовчи ва пассажир ўзи билан меҳнат дафтарчаси нусхаси ва айнан карантин даврида ишга жалб этилганлиги ҳақида ташкилотдан бирор-бир ҳужжат олиб юриши кераклиги таъкидланди.
«Вазирлик, давлат қўмиталари, агентликлар ва бошқа давлат ва хўжалик бошқаруви органлари, Қорақалпоғистон Республикаси Жўқорғи Кенгеси ва Вазирлар Кенгаши раислари ва уларнинг ўринбосарлари, ҳокимлар ва уларнинг ўринбосарлари хизмат автотранспорт воситалари ҳайдовчилари, кўплаб суиистеъмолчиликка йўл қўяётганлиги кузатилмоқда. Шунинг учун ушбу транспорт ҳайдовчиларига фақат иш вақтида хизмат зарурати билан ҳаракатланишга рухсат этилади,» — дейди матбуот котиби.
Йўл ҳаракати хавфсизлиги ходимлари ҳар бир автотранспортни визуал кўздан кечириб, автотранспорт йўналиши ва аниқ манзили юзасидан тушунтиришлар сўраши мумкинлиги маълум қилинди.
Изоҳ (0)