Андижонда сув хўжалиги ходимларини мажбурий тарзда ёнғоқ экишга жалб этган мансабдор шахс жавобгарликка тортилди. Бу ҳақда Бандлик ва меҳнат муносабатлари вазирлиги хабар бермоқда.
Маълум бўлишича, ижтимоий тармоқларда Андижон вилоятида карантин ва чеклов тадбирлари амалда бўлишига қарамай бюджет ташкилотларининг 500 дан ортиқ ходими мажбурий меҳнатга жалб қилингани юзасидан хабарлар тарқалган.
Вазирлик бу масалани ўрганган ва Андижон тумани ҳудудидаги адирликка ҳақиқатан ҳам 10—11 апрель куни ёнғоқ кўчатлари экилгани ва бунда Андижон вилояти сув хўжалиги бошқармасига қарашли корхона ишчилари мажбурий тарзда жалб этилганини аниқлаган.
Қайд этилишича, Меҳнат кодексининг 124-моддаси (Иш вақтидан ташқари иш) ҳамда 177-моддаси (Иш берувчининг бурчлари) талаблари бузилганлиги учун корхона раҳбарига нисбатан Маъмурий жавобгарлик тўғрисидаги кодекснинг 49-моддаси 1-қисми (Мансабдор шахс томонидан меҳнат ва меҳнатни муҳофаза қилиш тўғрисидаги қонун ҳужжатларини бузиш) билан маъмурий жавобгарликка тортилди.
Ушбу моддада бузиш базавий ҳисоблаш миқдори (16 апрель ҳолатига кўра 223 минг сўм)нинг 5 бараваридан 10 бараваригача миқдорда жарима жазоси белгиланган.
Шунингдек, Андижон вилояти Сув хўжалиги бошқармаси, «Андижон ҳудудий электр тармоқлари корхонаси» АЖ, «Андижон ҳудудгаз» МЧЖ, Андижон вилояти «Сувоқова» ДУКда олиб борилган ўрганишлар натижасида мажбурий меҳнатга жалб қилиш ҳолатлари аниқланмаган.
Бундан ташқари, адирлик ҳудудида Андижон, Булоқбоши тумани ободонлаштириш бошқармаларининг ҳақ тўланадиган жамоат ишига жалб этилган ходимлари 2020 йил 13—15 апрель кунлари ободонлаштириш ишларида иштирок этгани аниқланган.
Эслатиб ўтамиз, коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича Республика махсус комиссиясининг 4 апрелдаги йиғилишида белгиланган қўшимча чора-тадбирларга кўра, 6 апрелдан бошлаб шахснинг биринчи галдаги ҳаётий зарур бўлган эҳтиёжлари (озиқ-овқат, дори-дармон, тиббий буюм ва воситаларни харид қилиш ва бошқалар) учун ва шифокор кўригига мурожаат этишдан бошқа мақсадларда кўчага чиқиши қатъиян чекланган.
Изоҳ (0)