Сурхондарё вилоятида 15 апрель, чоршанба куни, тунги соат 22:30 да Isuzu юк машинаси ҳамда Damas иштирокида ЙТҲ содир бўлган. Бу ҳақда ИИВ ҳузуридаги Тергов департаменти хабар қилди.
Хабарга кўра, 4-Р 102 автомобиль йўлининг Ангор тумани «Илғор» маҳалласи ҳудудидан ўтувчи 16-километрида Жарқўрғон—Ангор йўналиши бўйича келаётган 22 ёшли Ж.Т. бошқарувидаги Isuzu русумли автомашина қарама-қарши йўналишдаги 20 ёшли Ж.А. бошқарувидаги Damas’нинг йўлига чиқиб кетиб, йўл-транспорт ҳодисаси содир этган.
Оқибатда Damas ҳайдовчиси Ж.А. тан жароҳати олиб, туман тиббиёт бирлашмасига ётқизилган, бироқ кўрсатилган тиббий муолажаларга қарамай шифохонада вафот этган.
Мазкур ҳолат юзасидан Ангор туман ИИБ ҳузуридаги Тергов бўлинмаси томонидан Ўзбекистон Республикаси Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, дастлабки тергов ҳаракатлари олиб борилмоқда, дейилган хабарда.
2019 йил 23 декабрда Сурхондарё вилояти Ангор тумани ҳудудида Isuzu автобуси иштирокида ЙТҲ юз берган, ўшанда ҳайдовчи бетон тўсиқдан сакраб ўтаётган пиёдани уриб юборганди. 2020 йил 1 январь куни эса М-39 Олмаота—Бишкек—Тошкент—Термиз йўлининг Ангор туманидан ўтган 1425-километрида инсон ўлими билан тугаган йўл-транспорт ҳодисаси юз берган: Lacetti ҳайдовчиси пиёдани уриб юбориб, воқеа жойидан қочиб кетгани ҳақида хабар берилганди.
Изоҳ (0)