Европа тараққиёт ва тикланиш банки савдони молиялаштиришни қўллаб-қувватлаш учун маблағлар ажратади. Бу ҳақда банк ахборот хизматига таяниб, «Spot» хабар қилган.
Ташкилот коронавирус пандемиайси шароитида маблағ ажратиш орқали маҳаллий корхоналарнинг ўз фаолиятини давом эттиришига кўмак бермоқчи.
ЕТТБнинг савдони ривожлантириш дастури доирасида «Асакабанк», «Ипотекабанк» ва «Ўзсаноатқурилишбанк»га 150 миллион АҚШ доллари миқдоридаги маблағлар ажратилади.
«Ушбу маблағлар Ўзбекистондаги экспортер ва импортер компанияларга оғир бозор шароитларида савдо операцияларидаги, етказиб бериш тизимларидаги тўхталишларни енгиб ўтиш учун ажратилади», — дейилади ЕТТБ ахборотида.
«Асакабанк» ва «Ўзсаноатқурилишбанк» аксионерлик-тижорат банкларига 60 миллион доллардан, «Ипотека-банк» ҳисобига эса 30 миллион доллар келиб тушади. Учала банк ҳам ЕТТБ мижозлари ҳисобланади. Улар мамлакат миқёсида 100 дан ортиқ филиалга эга ва ўн минглаб муассасаларга банк хизматларини кўрсатади.
Банклар маҳаллий фирмалар фаолиятини барқарорлаштириш учун яхши имкониятларга эга, уларни қўллаб-қувватлаш эса миллий иқтисодиётга кўмак беришда муҳим аҳамият касб этади, дея 3 та банкни эътироф қилган халқаро ташкилот. Бугунгача Европа тикланиш ва тараққиёт банки Ўзбекистон иқтисодиётига 1,85 миллиард евро миқдорида маблағ ажратган.
Мавзуга доир:
Изоҳ (0)