Ўзбекистонда томорқа ерлардан унумли фойдаланмаган фуқаролар жаримага тортилади

Парламент қуйи палатасининг 2020 йил 16 апрель куни бўлиб ўтган мажлисида депутатлар «Ўзбекистон Республикасининг Маъмурий жавобгарлик тўғрисидаги кодексига қўшимча ва ўзгартишлар киритиш ҳақида»ги қонун лойиҳасини атрофлича муҳокама қилди, деб хабар берган парламент матбуот хизмати.

Олий Мажлис Қонунчилик палатаси депутатлари ҳудудларга чиқиб аҳолининг томорқа ерлардан фойдаланиш ҳолатларини таҳлилий ўрганмоқда. Ўрганишларда кўплаб аҳоли ўз экин майдонларидан имкон қадар унумли фойдаланаётган бир пайтда айрим фуқаролар томорқаларини ўз ҳолига ташлаб қўйгани аниқланган.

Белгиланган тартиб-таомилга биноан ҳозирда томорқага қандай экин экиш аҳолининг ўз таклифлари асосида шакллантирилади. Бироқ шунга қарамай томорқа эгаси у ёки бу маҳсулотни етиштиришни ўзи режалаштирсаю, амалда уни бажармаса, бу ҳолат озиқ-овқат захирасини шакллантиришга ҳам салбий таъсир қилади ва албатта бундай лоқайдлик ўз баҳосини олиш шарт, дейилган хабарда.

Депутатлар «Ўзбекистон Республикасининг Маъмурий жавобгарлик тўғрисидаги кодексига қўшимча ва ўзгартиришлар киритиш тўғрисида»ги қонун лойиҳасини муҳокама қилиб, лойиҳа билан ушбу кодексни янги 651-модда билан тўлдиришни таклиф қилган. Унга кўра томорқа ерлардан унумли фойдаланмаганлик учун маъмурий жавобгарлик белгиланмоқда.

Яъни томорқага ўз танлови асосида бирон-бир қишлоқ хўжалик экини экмаган фуқаролар аввал огоҳлантирилади, кейин базавий ҳисоблаш миқдорининг бир бараваридан уч бараваригача миқдорда жаримага тортилади. Агар мазкур ҳолат бир йил давомида такроран содир этилса, бу қиймат уч баравардан беш бараваргача миқдорда бўлиши белгиланмоқда.

Қуйи палата вакилларининг фикрича мазкур қонун лойиҳасининг қабул қилиниши томорқа ер участкаларидан янада самарали фойдаланиш, ер участкаси эгаларининг масъулиятини ошириш ва охир-оқибатда озиқ-овқат хавфсизлиги ҳамда аҳоли бандлигини таъминлашга хизмат қилади.

Аввалроқ 8 апрель куни Президент Шавкат Мирзиёев раҳбарлигида ўтган видеоселекторда синовли даврда томорқа ерларига экин экмаслик, қаровсиз ташлаб қўйиш юртга ва ерга нисбатан хиёнат деб баҳоланиши кераклиги, шунинг учун томорқадан самарали фойдаланмаётган хонадон эгалари расман огоҳлантирилиши, ундан кейин ҳам экин экмаганларга ер солиғи оширилган ставкада қўлланилиши маълум қилинган. Бу борада мутасадди раҳбарларга тегишли ҳужжатни қабул қилиш топширилди. Томорқалар ҳолатини дронлар орқали мониторинг қилиш ҳамда улардан унумли фойдаланиш учун ҳар бир сектор кесимида зарур чора-тадбирларни амалга ошириш бўйича кўрсатмалар берилганди. Кейинчалик 13 апрелда палаталар Ўзбекистонда томорқа ер участкаларидан самарали фойдаланмаганлик учун жавобгарлик кучайтирилиши бўйича қўшма қарорни қабул қилган.