Саудия Арабистони хавфсизлик кучлари Neom номли футуристик шаҳар қурилишига қарши чиққан Абдул-Раҳим ал-Ҳувайтийни отиб ташлади. Бу ҳақда Daily Mail хабар берди.
Маълум қилинишича, ёши номаълум бўлган ал-Ҳувайтий хавфсизлик кучларига қарши ўт очган ва Молотов коктейлини улоқтирган ҳамда бино томидаги қум солинган қоплар орқасига яширинган. У бу ишларни ўзи мансуб бўлган ҳувайтатлар қабиласига тегишли деб ҳисоблаган ерни ҳимоя қилиш учун қилган.
Ҳукумат томонидан маълум қилинишича, ал-Ҳувайтий таслим бўлиш ҳақидаги чақирувларга жавоб бермаган. Эркак ўт очишнинг ва Молотов коктейлини улоқтиришни давом эттиргани сабабли хавфсизлик кучлари уни йўқ қилган.
Отиб ташланган эркак валиаҳд шаҳзода Муҳаммад ибн Салмон кўмагида лойиҳалаштирилган футуристик шаҳар қурилишига қарши чиққан. Лойиҳа сабабли эркакнинг қабиласи мазкур ҳудуддан кўчирилган. Қабиланинг маълум қилишича, ҳукумат қаршилик кўрсатган эркак билан маслаҳатлашмасдан уни кўчишга мажбур қилган.
Neom сайёҳлик йўналишида фаолият олиб борадиган ақлли шаҳар бўлиши кутилмоқда. Лойиҳани 2025 йилгача амалга ошириш режалаштирилган, унинг қиймати тахминан 500 миллиард долларни ташкил қилади.
Изоҳ (0)