Россия бош вазири COVID-19’ни даволашда давлат рўйхатидан ўтказилмаган Хитой препаратидан фойдаланишга рухсат берди

Россия бош вазири Михаил Мишустин Миллий тиббиёт тадқиқотлари кардиология марказига, тиббиёт муассасаларига Хитойдан келтирилган препаратни бепул тарқатиш ва ундан коронавирусни даволашда фойдаланиш бўйича топшириқ берди. Ҳукумат раҳбарининг фармойиши Россия ҳуқуқий ахборот порталида эълон қилинган, деб хабар берди «РБК».

«Марказ препаратларнинг сақланиши ва коронавирусга чалинган беморларни даволаётган давлат ва хусусий ташкилотлари ҳамда клиникаларга имтиёзли равишда тарқатилишини таъминлаши лозим. Препаратнинг номи «Гидроксихлорохин» ва у халқаро патент олмаган, таблетка кўринишида, 100 мг, 14-рақамли, жами 68 600 та қадоқланган, Хитой Халқ Республикасидан инспонпарварлик ёрдами сифатида юборилган,  Shanhay Farmasyutikals Co., LTD томонидан ишлаб чиқарилган», — дейилган ҳукумат фармойишида.

Ҳужжатда «Росздравнадзор» РФнинг «Дори воситалари билан муомала қилиш тўғрисида»ги қонунига мувофиқ препаратдан самарали фойдаланилиш ва унинг беморларга зарар етказмаслиги устидан назорат қилиш лозимлиги қайд этилган.

«РБК» нашрининг Россия соғлиқни сақлаш вазирлиги ахборот хизматига асосланиб хабар қилишича, ушбу препарат мамлакат ҳудудида рўйхатдан ўтказилмаган.

Дори воситалари рўйхатдан ўтказилган давлат реестрида 4 та препарат гидроксихлорохин асосидаги таркиб билан баён этилган. Иккитаси шундай номланади ҳам, қолган иккиси «Плаквенил» ва «Иммард» деб аталади. Ушбу дори воситалари Ирландия, Канада, Ҳиндистон ва Россияда ишлаб чиқарилади. Хитой ишлаб чиқарувчилари реестрга киритилмаган.

«Гидроксихлорохин» безгакка қарши хусусиятларга эга, шунингдек, яллиғланишга қарши ва иммунодепрессив восита. Россия соғлиқни сақлаш вазирлигининг COVID-19’га қарши кураш бўйича тавсияларининг бешинчи версиясида ушбу препарат SARS-CoV ва MERSCoV коронавируслари келтириб чиқарган атипик пневмонияни даволашда ишлатилиши ҳақида маълумот берилган. Вазирлик ундан ташқари «Хлорохин», «Лопинавир+Ритонавир», «Азитромицин» ва бошқа интерферон препаратларни ҳам тавсия қилган.