Жорий йилнинг 16 мартидан биржанинг ун бозорида талаб ошиб, биржа савдоларида харидорлар сони ҳам ортган.«Дарё» мухбири Мусулмонбек Иброҳимовнинг хабар беришича, бу ҳақда 16 апрель куни АОКА ҳузуридаги штабда бўлиб ўтган брифингда «Товар-хом ашё биржаси» АЖ ахборот хизмати раҳбари Ҳикматилла Тиллабоев айтиб ўтди.
Биржа вакилининг маълум қилишича, 2020 йилнинг 16 мартидан бери ун бозорида талабнинг ўсиши кузатилмоқда.
«Хусусан, март ойининг бошларида ун бўйича биржа савдоларида ўртача 1 800 та харидорлар иштирок этган бўлса, бугунги кунда уларнинг сони ўртача 4 500 тага етди. Шу муносабат билан унга бўлган талабни тўлақонли қондириш мақсадида Иқтисодий тараққиёт ва камбағалликни қисқартириш вазирлиги, «Ўздонмаҳсулот» АК, «Ўзбекистон Республикаси товар-хом ашё биржаси» АЖ билан биргаликда март ойида биржа савдоларига қўшимча 19 минг тонна ун маҳсулоти қўйилди. Айни пайтда биржа савдоларига ҳар куни ўртача 6 900 тонна биринчи навли ун қўйилмоқда. Буларнинг натижасида кўриб чиқилаётган даврда уннинг ўртача ҳафталик котировкаси, яъни нархи бир килограмми учун 2 494 сўмдан 2 471 сўмгача пасайди.»
Изоҳ (0)