Мажбурий ижро бюросининг Тошкент шаҳар Яккасарой туман бўлими «Ўзтрансгаз« акциядорлик жамиятининг Навоий ИЭС олдидаги 56,5 миллиард сўмлик қарздорлигини ундирди. Бу ҳақда «Дарё»га Мажбурий ижро бюроси томонидан маълум қилинди.
Хабар берилишича, Мажбурий ижро бюросининг Яккасарой туман бўлими иш юритувига Кармана туманлараро иқтисодий судининг 2020 йил 13 январдаги ижро варақаси келиб тушган. Унга кўра, «Ўзтрансгаз» акциядорлик жамиятининг Навоий ИЭС олдида 56,5 миллиард сўмлик қарздорлиги бўлган.
Қарздор ташкилот «Ўзтрансгаз» томонидан қонун талаблари бўйича берилган ихтиёрий муддатда қарздорлик тўланмаган.
Натижада, МИБнинг Яккасарой туман бўлими томонидан олиб борилган ижро ҳаракатлари давомида қарздор ташкилотдан ундирувчига 56,5 миллиард сўмлик қарздорлик ундириб берилган.
Аввалроқ Мажбурий ижро бюроси «Оҳангароншифер»нинг 146 нафар ходимига 388 миллион сўмлик иш ҳақини ундириб бергани, Сирдарёда электр энергиясидан ноқонуний фойдаланиб, балиқчилик билан шуғулланган шахс МИБнинг ўрганишлари натижасида 120 миллион сўм жаримага тортилгани ҳақида хабарлар берилган эди.
Изоҳ (0)