15 апрель куни Қорақалпоғистон Республикасининг Хўжайли туманида чўкаётган аёл профилактика инспекторлари томонидан қутқариб қолинди. Бу ҳақда Қорақалпоғистон Республикаси Ички ишлар вазирлиги матбуот хизматига таяниб, «Postda.uz» хабар қилган.
Воқеа Хўжайли тумани ИИБ ҲПБ профилактика катта инспектори, капитан Бийсенбай Қайипназаров ва профилактика инспектори, капитан Саламат Утемисов кундалик тақсимот бўйича ўзларига бириктирилган «Суўенли» МФЙ ҳудудида аҳолининг карантин қоидаларга амал қилишини назорат қилиш юзасидан хизмат олиб бораётган пайтда рўй берган.
Ходимлар чамаси соат 11:00 ларда ҳудуддан оқиб ўтувчи Суўенли канали бўйида чўкаётган аёлни кўриб қолган. Уларнинг тезкор амалий ҳаракатлари туфайли фуқаронинг ҳаёти сақлаб қолинган.
Қутқарилган аёлнинг шахси ҳам аниқланган. У шу туманда яшовчи 1989 йилда туғилган Д.А. бўлиб чиқди. Аёл оилавий келишмовчилик туфайли ўз жонига суиқасд қилмоқчи бўлган. Ҳолат юзасидан суриштирув ишлари олиб борилмоқда, дейилади хабарда.
Аввалроқ Тошкентда Қичқириқ каналида чўкаётган аёлнинг Миллий гвардия ходимлари томонидан қутқарилгани, ФВВ академияси курсанти Наманганда каналда оқиб кетаётган фуқарони сувдан олиб чиққани, Наманганда чўкаётган аёлни қутқарган миллий гвардия ходимининг ўзи сувда бедарак йўқолгани, Самарқандда талабалар Дарғом каналида чўкаётган қизни қутқариб қолгани ва тақдирлангани, Тошкентда ИИББ патрул-пост хизмати ходими Бўзсув каналига тушиб кетган аёлни қутқаргани ҳақида хабарлар берилган.
Изоҳ (0)