Қозоғистон пойтахти Нур-Султон шаҳрида ахлатга ташланган тиббиёт ниқоблари, қўлқоплар ва антисептик воситалар идишларини 1200-1250 даражадаги ҳароратда утилизация қилиш бошланди. Бу ҳақда Tengrinews хабар берган.

Фото: Tengrinews

Буюмлар термик қиздирувчи махсус аппаратда утилизация қилинмоқда. Уч камерали қайта ишлашдан кейин ушбу буюмлардан фақат тозаланган ҳаво тутуни қолади. Карантин бошланганидан бери шаҳарда жами 35 килограмм оғирликдаги чиқиндилар утилизация қилинган.

Нур-Султонда бозорлар, савдо-кўнгилочар марказлари ва бошқа жамоат жойларида 80 дан ортиқ экобокс (экологик ахлат қутилари) жойлаштирилган, уларга фақат тиббий ниқоблар, қўлқоплар, салфетка, антисептик воситаларнинг идишлар ва бошқа ҳимоя жиҳозлари ташланади.

Фото: Tengrinews

Экобокслар Нур-Султон ҳокимлиги кўмагида Clean Сity компанияси томонидан ишлаб чиқарилган.

«Экобокслар тўлиши билан тезкор тарзда ўрнига бошқа қути жойлаштирилади. Ахлат термик ёқиш йўли билан йўқ қилинади ва бу энг хавфсиз усул», – дейди компания вакили Алмас Рисалиев.

Фото: Tengrinews

Қозоғистонда 15 апрель ҳолатига кўра коронавирусга чалинганлар сони 1295 нафарга етган, 240 нафар одам касалликдан тузалган, 16 киши COVID-19’дан вафот этган.