АҚШ Ғазначилиги пандемия шароитида фуқароларга моддий ёрдам тариқасида тарқатиладиган чекларда мамлакат президенти Дональд Трампнинг исмини кўрсатиш бўйича топшириқ берган. Бу ҳақда The Washington Post хабар берди.
Ҳар бирининг қиймати 1200 долларни ташкил қиладиган чеклар 70 миллион америкаликка тарқатилади. «Президент Дональд Ж. Трамп» сўзи чекнинг чап томонига туширилади.
Агар мазкур ёзув чекларда чоп этиладиган бўлса, бу президентнинг исми бу каби чекларга туширилган биринчи ҳолат бўлади. АҚШ президенти администрациясидаги манбаларнинг маълумотларига кўра, Трамп Ғазначилик бошлиғи Стивен Мнучиндан чекларни имзолашга рухсат сўраган. Бироқ бу АҚШ қонунларига тўғри келмайди. Бунинг ўрнига чеклардаги «Компенсацион иқтисодий тўлов» сўзи остида президентнинг исми бўлади.
Мазкур тўловлар коронавирус тарқалиши шароитида аҳолини қўллаб-қувватлаш бўйича чоралардан бири ҳисобланади. Оилали бўлмаган ва йиллик даромади 75 минг доллардан ошмайдиган кишилар 1200 долларлик чек олади. Турмуш қурган ва йиллик даромади 150 минг доллардан ошмайдиган жуфтликлар 2400 доллар олади. Барча ота-оналар 17 ёшдан ошмаган ҳар бир фарзанди учун 500 доллардан олади.
Март ойининг охирида АҚШда иқтисодиёт ва аҳолини қўллаб-қувватлаш бўйича 2 триллион долларлик чоралар дастури маъқулланди. Унга кўра, АҚШ фуқароларига ўқиш учун тўловларни кечиктириш, ишсизлик нафақаларини ошириш таклиф қилинади, шунингдек, тиббий муассасалар ва авиаташувчиларга молиявий кўмак ҳам таклиф қилинган.
АҚШда коронавирус тарқалиши билан боғлиқ дунёдаги энг мураккаб вазият юзага келган. Жонс Ҳопкинс университети маълумотларига кўра, АҚШда коронавирусга чалинганлар сони 609 минг кишидан ошган. Мамлакатда сўнгги бир суткада коронавирус қурбонлари сони бўйича кунлик антирекорд янгиланди — бир суткада 2,2 мингдан ортиқ бемор вафот этди.
Аввалроқ Дональд Трамп Жаҳон соғлиқни сақлаш ташкилотини молиялаштиришни тўхтатишини маълум қилгани ҳамда унинг бу қарори Европа Иттифоқи, БМТ, Хитой ва Германия томонидан қоралангани ҳақида хабарлар берилганди.
Изоҳ (0)