Европа Иттифоқининг ташқи сиёсат ва хавфсизлик бўйича вакили Жозеп Боррель АҚШ президенти Дональд Трампнинг Вашингтон томонидан Жаҳон соғлиқни сақлаш ташкилоти (ЖССТ)ни молиялаштириш тўхтатилиши ҳақидаги қарорини танқид қилди. Бу ҳақда «РБК» хабар берди.
«Пандемияга қарши курашиш учун ЖССТнинг ҳаракатлари зарур бўлиб турган бир пайтда бу қарорни оқлаши мумкин бўлган ҳеч қандай сабаб йўқ. Инқироз устидан фақатгина кучларни бирлаштириб ғалаба қозониш мумкин», — деб ёзган Европа Иттифоқи вакили Twitter’да.
Deeply regret US decision to suspend funding to @WHO. There is no reason justifying this move at a moment when their efforts are needed more than ever to help contain & mitigate the #coronavirus pandemic. Only by joining forces we can overcome this crisis that knows no borders.
— Josep Borrell Fontelles (@JosepBorrellF) April 15, 2020
Дональд Трампнинг бу қарорини Хитой, Германия ва БМТ ҳам қоралади. Хитой Ташқи ишлар вазирлиги вакили Чжао Лицзяннинг таъкидлашича, бу қарор ташкилотнинг имкониятларини пасайтиради ва эпидемияга қарши турадиган халқаро ҳамкорликка зарар етказади. Германия ташқи ишлар вазири Хайко Мааснинг қайд этишича, Трампнинг ташкилотга қўйган айблови ёрдам бермайди. «БМТ ва ЖССТни, шу жумладан, тестлар ва вакциналар ишлаб чиқишда ва тарқатишда қўллаб-қувватлаш ва кучайтириш энг яхши инвестиция бўлган бўлар эди», — деб маълум қилган Германия ТИВ раҳбари.
БМТ бош котиби Антониу Гутерришнинг маълум қилишича, ЖССТни қўллаб-қувватлаш керак, чунки унинг фаолияти COVID-19 билан урушда ғалаба қозониш учун дунё ҳамжамиятининг ҳаракатлари доирасида жуда муҳим ҳисобланади, ҳозир ресурсларни қисқартирадиган вақт эмас.
Трамп БМТнинг органи ҳисобланадиган ЖССТни молиялаштиришни тўхтатиш ҳақида бир неча марта гапирган. АҚШ президенти янги турдаги коронавируснинг тарқалишида ЖССТни айбдор деб ҳисобламоқда. Ташкилотга бадал тўлашни тўхтатиш ҳақида Трамп 14 апрель куни маълум қилди.
Жаҳон соғлиқни сақлаш ташкилоти 1948 йилнинг 7 апрель куни таъсис этилган. АҚШ ҳар йили ЖССТнинг бюджетига 400-500 миллион доллар ўтказиб беради, Хитой эса 40 миллион доллар тўлайди. Ташкилотнинг маълумотларига кўра, АҚШнинг ҳиссаси 14,7 фоизни ташкил қилади. Ундан кейинги ўринда Билл ва Мелинда Гейтснинг хусусий фонди 9,76 фоиз билан туради. Мамлакатлардан иккинчи ўринни 7,79 фоиз ҳисса билан Буюк Британия эгаллаб туради. Учинчи ўринда Германия 5,68 фоиз билан туради. Хитойнинг ташкилот бюджетидаги ҳиссаси 0,21 фоизни ташкил қилади.
Изоҳ (0)