Россияда коронавирус билан касалланиш белгиларсиз ўтаётган кишиларнинг улуши ошиб бормоқда. Бу ҳақда «Роспотребнадзор» раҳбари Анна Попова маълум қилди, деб хабар берди «Первий канал» телеканали.
Унинг сўзларига кўра, март ойининг бошида Россияда қайд этилган беморларнинг 10 фоизида коронавирус белгиларсиз ўтган. Айни пайтда бундай беморларнинг улуши қарийб 30 фоизни ташкил қилмоқда, баъзи ҳудудларда кўрсаткич бундан ҳам юқори.
Анна Попованинг айтишича, одамлар кўпроқ текширилгани буён касалликни белгиларсиз ўтказаётганлар шунча кўпроқ аниқланмоқда. 14 апрель куни Москвада қайд этилган янги ҳолатларнинг 52 фоизи айнан белгисиз ҳолатлар ҳисобланади. Бу одамларнинг соғлиғида ҳеч қандай ўзгариш йўқ, бироқ уларда вирус мавжуд ва уларнинг ўзи ҳам буни билмайди. Унинг қўшимча қилишича, COVID-19 нинг белгиларсиз кечиши саломатлик учун қандай оқибатлар келтириб чиқариши ҳақида ҳозирча ҳеч қандай маълумот йўқ.
Унинг фикрича, коронавируснинг белгиларсиз ҳолатлари кўпайгани сабабли «ўзини яккалаш» режими ҳамда имконият даражасида нафақат беморлар, балки белгилар бўлмаган кишиларда ҳам тест ўтказиш муҳим ҳисобланади.
Россияда сўнгги бир суткада коронавирусга чалиниш бўйича 3388 та янги ҳолат қайд этилди. Мамлакатда касалланганларнинг умумий сони 24 490 кишига етди, коронавирусдан вафот этганларнинг умумий сони эса 198 кишига етган.
Изоҳ (0)