Apple Ўзбекистон ҳудудида App Store’даги дастурлари нархи ўзгаришини маълум қилди.
«Яқин кунлар ичида App Store’даги дастурлар ва илова ичидаги харидлар нархи (автоматик обунадан ташқари) Барбадос, Молдова ва Ўзбекистонда жорий этилган қўшилган қиймат солиғи бўйича ўзгаради», — дейилади хабарда.
Компания, шунингдек, дастур ишлаб чиқувчиларга мурожаат қилиб, уларнинг даромадлари солиқсиз нарх асосида тузатилиши ва ҳисоблаб чиқилишини маълум қилди.
Экспертлар билан суҳбатлашган Spot нашрининг ёзишича, бу 2020 йилнинг бошида Ўзбекистонда жорий этилган «Google солиғи»га боғлиқ бўлиши мумкин. «Google солиғи»га кўра, электрон шаклда товарлар ва хизматларни кўрсатадиган, хизмат кўрсатиш жойи Ўзбекистон бўлган хорижлик юридик шахслар жисмоний шахсларга кўрсатилаётган бундай хизматлар бўйича солиқ тўловчилар сифатида тан олинади. Мазкур янгилик Google, «Яндекс», турли агрегат ва бошқа сайтларга тааллуқли ҳисобланади.
«Apple хорижий интернет-компанияси сифатида Ўзбекистонда солиқ тўловчи сифатида рўйхатдан ўтган ва эндиликда ҚҚС тўлайди», — дейди экспертлардан бири.
Эслатиб ўтамиз, февраль ойида Давлат солиқ қўмитаси хорижий интернет-компаниялар учун ҚҚС офисларни яратган эди. Ўзбекистон Солиқ кодексининг янгиланган таҳририда «Google солиғи» белгилаб қўйилгани ҳақида хабар берилган. «Яндекс»нинг Ўзбекистондаги минтақавий директори лавозимида бир неча йиллар ишлаган Евгений Лукьянчиков «Google солиғи» икки томонлама солиққа тортилишга олиб келиши мумкинлигини маълум қилганди.
Изоҳ (0)