Коронавирус пандемияси вақтида одамлар Google’дан энг кўп нима ҳақда сўраётгани маълум бўлди

Коронавирус пандемияси туфайли жорий қилинган карантин ҳаётимизда ўчмас из қолдирмоқда. Кўпчилик ўзгарган ҳаётий шароитларга мослашмоқда. Google Trends’нинг сўнгги маълумотлари ҳам бундан далолат беради.

«Қандай қилиб?» деб бошланган сўровлар орасида «Қандай қилиб матодан ниқоб тикиш мумкин?», «Қандай қилиб санитайзер тайёрлаш мумкин?», «Қандай қилиб инфекцияни ўлдирувчи сочиқчалар тайёрлаш мумкин?», «Қандай қилиб ҳожатхона қоғозини тайёрлаш мумкин?», «Қандай қилиб дезинфекцияловчи спрей тайёрлаш мумкин?» каби саволлар етакчилик қилади.

Google мутахассислари, шунингдек, «Қайчи билан сочни қандай қисқартириш мумкин?» (+140 %) «Уйимга яқин кучуклар боқиладиган жой» (+100%) каби сўровлар ҳам кўпайганини айтган.

Бундан ташқари, одамларни овқатдан коронавирус юқтириш эҳтимоли, бепул етказиб бериш хизматлари, узоқ сақланадиган маҳсулотларни сотиб олиш ҳақидаги маълумотлар ҳам қизиқтирмоқда.

Коронавирус муаммоси билан Италия, Испания, Ирландия, Буюк Британия ва Франция аҳолиси кўпроқ қизиқмоқда.

Пандемия билан боғлиқ саволлар орасида «Коронавирус қачон тугайди?», «Коронавирусга тестни қаердан топширса бўлади?», «Коронавирус буюмлар юзасида қанча яшайди?» каби сўровлар энг кўп учрамоқда.