Карантин даврида транспорт воситалари ҳаракатига қўйилган чеклов сабабли Навоий шаҳрида янги туғилган чақалоқ туғруқхонадан ўз уйига ички ишлар ходимларининг хизмат машинасида олиб борилди. Бу ҳақда Навоий вилояти ИИБ хабар берди.
Маълум қилинишича, жорий йилнинг 15 апрель куни Навоий шаҳрида яшовчи фуқаро Рустам Тўлаев «Севимли» канали Навоий вилояти мухбирига телефон орқали мурожаат этиб, яқинда фарзандли бўлганлигини, айни пайтда турмуш ўртоғи ҳамда чақалоқнинг вилоят туғруқхонасидан чиқишига рухсат берилганини айтган. Бироқ карантин муддатида шаҳар кўчаларида автотранспорт воситалари ҳаракати чекланганлиги муносабати билан йўл узоқлиги сабабли фарзанди ҳамда турмуш ўртоғини ўз хонадонига олиб кела олмаётганлигини билдирган.
Таъкидланишича, Рустам Тўлаевнинг муаммосига вилоят ички ишлар органлари ходимлари ижобий ечим топилган. Патрул-пост хизмати ходимлари кўмагида чақалоқ ва унинг ота-онаси яшаш хонадонига соғ-саломат олиб борилган.
Аввалроқ Навоий вилояти ИИБ ходимларининг тезкор ҳаракати туфайли чегара постида 1 яшар қизнинг ҳаёти сақлаб қолинган эди.
Шунингдек, Навоийда карантин вақтида ўз уйини дискотекага айлантирган ёшлар жаримага тортилгани ҳамда Навоийда карантин вақтида қиморхона ташкил қилган фуқарога нисбатан жиноий иш қўзғатилгани ҳақида хабарлар берилган эди.
Изоҳ (0)