Бош прокуратуранинг Ички ишлар органларида қонунчилик ижроси устидан назорат бошқармаси бошлиғи Содиқжон Бердиалиев АОКАда бўлиб ўтган брифингда масъул ташкилотларнинг ходимларидан иборат тезкор-тергов ва таҳлилий гуруҳ томонидан қоидабузарликлар бўйича аниқланган маълумотларни келтириб ўтди.
Жумладан, 65 ёшдан юқори кексаларнинг уйдан чиқмасликлари қарори юзасидан 3261 нафар кекса ёшдаги фуқаро томонидан ҳам карантин қоидаларини бузиш ҳолатлари қайд этилгани таъкидланди.
Мавзуга доир: Ўзбекистоннинг йирик шаҳарларида «ўзини яккалаш» тартиби 6 апрелдан мажбурий жорий этилади
15 апрель ҳолатига кўра, карантин қоидаларига амал қилмаслик бўйича 63 882 та ҳуқуқбузарлик аниқлангани айтилди: ҳуқуқбузарликларнинг 58 901 таси эркаклар, 4981 таси эса аёллар томонидан содир этилган.
Ҳуқуқбузарларнинг 60 628 нафари тиббий ниқоб тақмасдан юриш, 401 нафари карантин ҳудудини ташлаб кетиш, 220 нафари вақтинчалик тўхтатилган савдо фаолиятини давом эттириш, 29 нафари маросим ёки йиғинлар ўтказиш, 10 нафари ижтимоий тармоқларда ваҳима чиқарувчи ёки асоссиз маълумотлар тарқатиш ва 2594 нафари бошқа ҳуқуқбузарликларни содир этгани таъкидланди.
Карантин эълон қилинган кундан бошлаб 20 нафар фуқаро белгиланган тартибни қўпол равишда бузганлиги учун жиноят ишлари қўзғатилиб, аксарияти қамоққа олинган. Шу кунгача беморлар билан мулоқотда бўлган 9538 нафар шахс ҳақида тўпланган маълумотлар асосида улар билан мулоқотда бўлган шахсларнинг 2204 нафари беморнинг яқин қариндошлари, 3877 нафари бирга ишловчи ва доимий мулоқотда бўлган шахслар, 3453 нафари эса бир маротаба мулоқотга киришган шахслар эканлиги аниқланган.
Аввалроқ 1 апрелдан бошлаб Тошкент, Нукус шаҳарлари ва вилоятлар марказларида «ўзини яккалаш» («самоизоляция») ҳаёт тарзи жорий этилгани, Тошкент, Нукус шаҳарлари ва вилоятлар марказларида 65 ёшдан юқори бўлган фуқароларга уйидан ташқарига чиқиш қатъиян ман этилгани ҳақида хабар берилган эди.
Маълумот учун, Ўзбекистонда карантиннинг қачон тугаши номаълум — карантин даврини тугатиш Республика махсус комиссияси қарорига кўра амалга оширилади. Айни вақтда ёлғиз кексалар ва ногиронлиги бўлган шахсларга озиқ-овқат ва дори-дармон карантин даври охиригача бепул етказиб берилади.
Изоҳ (0)