Сирдарё вилоятида коронавирус инфекциясини юқтирганликда гумон қилиниб, карантинга олинган 140 нафар Хитой фуқароси ушбу касалликка чалинмаганлиги аниқланди, деб хабар бермоқда ЎзА.
Ўзбекистонда коронавирус пандемияси қайд этилгач, Президент ташаббуси билан республиканинг барча ҳудудларда ушбу дардга чалинганликда гумон қилинган фуқароларни алоҳидалаштириш (изолация) мақсадида кўплаб карантин муассасалари ташкил этилган эди.
Қайд этилишича, Сирдарё тумани ҳудудидаги Wang da group қўшма корхонасида худди шундай муассасалардан бири ташкил этилиб, у ерда Хитойдан чартер рейсларда Ўзбекистонга келган, Ўзбекистон—Хитой қўшма корхоналарида фаолият кўрсатаётган 140 нафар хитойлик тиббий назорат учун жойлаштирилганди.
Улар 14 кун давомида сирдарёлик 5 нафар олий, ўрта ва кичик тиббиёт ходимлари назоратида бўлган. Бу давр давомида улардан 2 маротаба таҳлил олиниб, Республика ва вилоят санитария-эпидемиологик осойишталик маркази қошидаги вирусология лабораториясида таҳлилдан ўтказилган ва мазкур лаборатория мутахассисларининг якуний хулосаларига кўра, уларда коронавирус аломатлари қайд этилмаган.
Хабарда айтилишича, ҳудуддаги қўшма корхоналарда фаолият юритаётган 140 нафар Хитой фуқароси соғлом эканлиги учун улар ўзлари меҳнат қилаётган муассасаларга кузатиб қўйилган.
Ўзбекистонда 15 апрель ҳолатига кўра, коронавирус инфекциясини юқтириб олганлар сони 1302 нафарни ташкил этмоқда. Шу кунгача касалланганларнинг тўрт нафари вафот этди, 107 нафари эса соғайиб, реабилитацияга олинди. Бундан ташқари, хорижда камида 23 ўзбекистонлик коронавирусга чалинган, уларнинг 3 нафари вафот этган.
Изоҳ (0)