Ички ишлар вазирлигининг Тергов департаменти 12 апрель, якшанба куни, Тошкент вилояти Нурафшон шаҳрида маст ҳолатда ўғрилик содир этаётган вақтида кекса кишилар бўлган уй эгаларига тан жароҳати етказган шахс қўлга тушганини хабар қилди.
«2020 йил 12 апрель соат 23:30 да муқаддам бир неча маротаба судланган 28 ёшли Х.Х. спиртли ичимлик таъсирида Нурафшон шаҳар ‘Наврўз’ маҳалласида яшовчи, 88 ёшли З.А.нинг хонадонига дераза орқали ғайриқонуний равишда кириб, меҳмонхонадаги шкафларини очиб, моддий қимматликларни қидираётган вақтида З.А. бу ҳаракатларини сезиб қолганида Х.Х. қўллари билан унинг бош қисмига уриб, оёқлари билан тепиб, уй эгасининг турмуш ўртоғи 85 ёшли М.А.га ҳаёт ва соғлиқ учун хавфли бўлган зўрлик ишлатган. Токчада турган қайчи билан унинг қўлларини кесиб, тан жароҳати етказган.
Ҳодиса жойидан 3 дона бармоқ излари, бир дона қайчи, Х.Х.га тегишли қора рангли қишки кепка, оёқ излари, қон суртмалари тегишли тартибда олинган.
Мазкур ҳолат юзасидан Нурафшон шаҳар ИИБ ҳузуридаги Тергов бўлими томонидан Ўзбекистон Республикаси Жиноят кодексининг 164-моддаси 3-қисми «в» банди (босқинчилик) билан жиноят иши қўзғатилиб, Х.Х. гумон қилинувчи тариқасида жалб қилиниб, процессуал тартибда ушланган», — дейилади хабарда.
Ҳозирда дастлабки тергов ҳаракатлари давом этмоқда.
Изоҳ (0)