Volkswagen концернининг 250 мингдан ортиқ мижози немис автомобилсозлик компаниясига қарши тарихдаги энг катта коллектив даъво аризасини берди. У 2015 йилда маълум бўлган дизельгейтга тегишли — компания автомобиллардан чиқадиган газлар таркибидаги зарарли моддалар даражасини пасайтириб кўрсатган. Мижозлар ектазилган моддий зарар қопланишини талаб қилмоқда. Тўланадиган умумий сумма 800 миллион евродан ошиб кетиши мумкин, деб хабар беради Handelsblatt.
Айни вақтда «алданган» мижозлар сони 250-262 мингни ташкил этмоқда. Улар ўз автомобилларини яхши нархда сота олмаган: зарарли моддаларнинг ҳавога чиқиш даражаси пасайтириб кўрсатилгани маълум бўлгач, Volkswagen моделларининг бозордаги нархи кескин тушиб кетган. Немис концерни ва истеъмолчиларнинг федерал бирлашмаси даъвонинг барча иштирокчилари 20 апрелга қадар рўйхатдан ўтиши лозимлиги ҳақида келишиб олди.
Дастлабки келишувга кўра, Volkswagen машина харид қилингандаги нархнинг 15 фоизи миқдорида компенсация тўлайди. Бу транспорт воситасининг тури ва ишлаб чиқарилган йилига қараб 1350-6257 евро оралиғида бўлади. Ўз навбатида, етказилган зарарни қоплаш учун жами 830 миллион евро керак бўлиши мумкин.
Компаниянинг қарорига рози бўлмаганлар индивидуал тартибда даъво киритишлари мумкин. Бу ҳолда ишни кўриб чиқиш 2020 йилнинг октябрига қадар давом этиши мумкин.
Бундан ташқари, Германия фуқароси бўлмаган ёки автомобилни 2015 йил 31 декабрдан кейин харид қилганларга компенсация тўланмайди.
Эслатиб ўтамиз, 2017 йилнинг августида Volkswagen компанияси ижрочи директори Оливер Шмидт АҚШнинг Детройт округ судидаги йиғилишда концерн дизель автомобилларининг зарари ҳақидаги маълумотларни қалбакилаштириш бўйича айбдорлигини тан олган эди.
Изоҳ (0)