13 мартга ўтар кечаси Ғиждувон туманида 22 ёшли фуқаро ўзининг шериги билан олдиндан жиноий тил бириктириб, «Бўлакиён» маҳалласида яшовчи фуқаронинг автомобилларини ёқиб юборди. Бу ҳақда ИИВ ҳузуридаги Тергов департаменти хабар берди.
Маълум бўлишича, 22 ёшли И.Ж.ни «Бўлакиён» маҳалласида яшовчи 61 ёшли Ғ.Т. билан олдиндан кир ювиш кукуни савдоси масаласида ўзаро келишмовчилиги бўлган. Шу сабаб у 21 ёшли таниши билан Ғ.Т.нинг ҳовлиси олдида турган Captiva ва Ford Tranzit русумли автомашиналари устига бензин сепиб, ўт қўйиб юборган. Йигитлар жабрланувчига кўп миқдорда моддий зарар етказиб, ҳодиса содир бўлган жойдан яширинган.
Ҳолат юзасидан Ғиждувон туман ИИО ФМБ ҳузуридаги тергов бўлими томонидан Ж.И. ва Ж.З.га нисбатан Жиноят кодексининг 173-моддаси (Мулкни қасддан нобуд қилиш ёки унга зарар етказиш) 2-қисми «б, в» бандлари билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)