Ички ишлар вазирлиги ҳузуридаги Тергов департаменти Самарқанд вилояти Ургут туманида «ВАЗ-2102» машинани ўғирлаб кетиб, ағдариб юборган гумонланувчининг қўлга тушганини хабар қилди.
Хабарга кўра, 13 апрель, душанба куни, 40 ёшли Ш.С. Ургут тумани бўйича ИИО ФМБ бошлиғи номига ариза билан мурожаат қилиб, унда 2020 йилинг 12 апрель кунидан 13 апрель кунига ўтар кечаси соат 23:00 ларда яшаш уйининг ёнида қолдирган ўзига тегишли бўлган «ВАЗ-2102» русумли транспорт воситасини номаълум шахс олиб қочиб кетганлигини ва ушбу ҳолат юзасидан қонуний чора кўришни сўраган.
Олиб борилган тезкор-қидирув ҳаракатлари давомида мурожаатчига тегишли бўлган «ВАЗ-2102» русумли транспорт воситасини 24 ёшли Л.Т. олиб қочгани ва бошқарувни йўқотиб автомашинани ағдариб юборгани аниқланган.
Мазкур ҳолат юзасидан Ургут тумани бўйича ИИО ФМБ ҳузуридаги Тергов бўлими томонидан Л.Т.га нисбатан Ўзбекистон Республикаси Жиноят кодексининг 267-моддаси 1-қисми (Транспорт воситасини олиб қочиш) билан жиноят иши қўзғатилиб, у гумон қилинувчи тариқасида жалб қилиниб, процессуал тартибда ушланган. Ҳозирда дастлабки тергов ҳаракатлари давом этмоқда.
Мавзуга доир:
Изоҳ (0)