Қирғизистон Соғлиқни сақлаш вазирлиги мамлакатда яна 41 кишида коронавирус аниқланганини маълум қилди, деб хабар беради «Kloop.kg».
Коронавирус аниқланган 18 бемор Ўш вилоятидаги Новқат туманида истиқомат қилади, Бишкекда — 12 нафар, Ўш шаҳрида — 6, Чуй вилоятида — 3, Норинда — икки киши вирус билан касалланган. Коронавирус билан касалланганларнинг 12 нафар тиббиёт ходими бўлиб, мамлакат бўйлаб COVID-19 билан касалланган тиббиёт ходимлари сони 51 кишига етди.
Коронавирусни юқтириб олган янги беморларнинг 22 нафари аёл ва 19 нафари эркак. Шунингдек, вирус билан касалланган беш киши даволанишга муваффақ бўлди — Жалолободда уч киши, Ўш ва Бишкекда бир кишидан. Бутун мамлакат бўйлаб коронавирус билан касалланганлар сони 339 кишига етди, беш киши вафот этган. Даволанишга муваффақ бўлганлар сони 44 кишига етган.
Аввалроқ Қирғизистонда коронавирус билан касалланган беморларнинг беш нафари реанимацияда эканлиги маълум қилинганди.
Эслатиб ўтамиз, Ўзбекистонда коронавирусга чалинганлар сони 694 кишига етди. Мамлакатда коронавирус инфекциясига чалиниш билан боғлиқ дастлабки ҳолат қайд этилганидан бери 42 киши соғайди, айни вақтда уч киши (бир аёл ва икки эркак) коронавирус сабаб вафот этди.
Изоҳ (0)