АҚШда ўтган бир сутка ичида коронавирус пандемияси бошланганидан буён энг юқори ўлим ҳолати қайд этилди — 2 мингдан ортиқ бемор вафот этди. Бу ҳақда Жонс Ҳопкинс университети маълумотларида келтирилган.
Мамлакатда коронавирус оқибатида вафот этганлар умумий сони 18 693 кишига етди. АҚШ қурбонлар сони бўйича дунёда Италиядан кейин (18 849) иккинчи ўринда кетмоқда. Энг кўп ўлим ҳолати Нью-Йорк шаҳрида қайд этилган (5820), шунингдек, Нью-Йорк ва Нью-Жерси штатларида ҳам вазият жиддий тус олган.
АҚШда коронавирус билан касалланганлар сони 500 минг кишидан ошиб кетди, бу дунёдаги энг юқори кўрсаткич ҳисобланади. Касалланганларнинг 28 837 нафари даволанишга муваффақ бўлган. Аввалроқ АҚШ вице-президенти Майкл Пенс мамлакатнинг баъзи йирик шаҳарларида коронавирус тарқалиши билан боғлиқ вазият яхшиланаётганини маълум қилганди.
Эслатиб ўтамиз, 8 апрель куни АҚШда бир сутка ичида 1965 бемор вафот этиб, антирекорд янгиланганди. 9 апрель куни эса коронавирус қурбонлари сони 1904 кишини ташкил этди.
Изоҳ (0)