Сингапур Таълим вазирлиги дарслардан бири хакерлар томонидан бузилиб, беҳаё суратлар жойлаштирганидан сўнг мактаб машғулотларини Zoom платформаси орқали ўтказишни тақиқлади. Бу ҳақда «ТАСС» хабар бермоқда.
Маълум бўлишича, воқеа ўрта мактаблардан бирида 8 апрель — маҳаллий мактабларда дарслар тўхтатилиб, масофавий таълим олишга ўтган куни содир бўлган.
«Онлайн-дарслар ўтказилиши давом этади, аммо бунинг учун бошқа платформа таналанади», — дея вазирликнинг 10 апрель куни тарқатилган хабарини келтирмоқда таълим технологиялари бўлими бошлиғи Арон Ло. Унинг айтишича, ўқитувчилар бундай платформалардан фойдаланганда дарсларни қандай қилиб хавфсиз ўтказиш кералиги бўйича яна бир бор кўрсатмалар олди. Шунингдек, вазирлик ходимлари ҳам зарур хавфсизлик чораларини ишлаб чиқиш борасида Zoom сервиси вакиллари билан маслаҳат олиб бораётганини қўшимча қилган.
Аввалроқ Google компанияси ўз ходимларига хавфсизлик стандартларига жавоб бермайдиган Zoom дастурини компьютерларга ўрнатишни тақиқлагани хабар берилган эди.
Zoom видеоконференцалоқа дастури компания ходимлари орасида коронавирус пандемияси сабаб масофадан туриб ишлашга ўтилганидан кейин оммалашди. Компаниянинг капитализацияси уч баробарга кўпайиб, кунлик фойдаланувчилар сони 200 миллиондан ошди.
Изоҳ (0)