Google компанияси ўз ходимларига хавфсизлик стандартларига жавоб бермайдиган Zoom дастурини компьютерларга ўрнатишни тақиқлади, деб хабар беради 1Prime.
«Сиёсатимизга кўра, биз ўз ходимларимизга корпоратив тармоғимизни хавф остига қўювчи синалмаган дастурларни ўрнатишга рухсат бермаймиз. Яқинда хавфсизлик бўйича жамоамиз корпоратив компьютерларда Zoom’дан фойдаланадиган ходимларимизни дастур хавфсизлик стандартларига жавоб бермагани сабаб ишга туширмаслик тўғрисида огоҳлантирди», — дейди компания вакили Хосе Кастанеда.
Zoom видеоконференц алоқа дастури компания ходимлари орасида коронавирус пандемияси сабаб масофадан туриб ишлашга ўтилганидан кейин оммалашди. Компаниянинг капитализацияси уч баробарга кўпайиб, кунлик фойдаланувчилар сони 200 миллиондан ошди.
Сўнгги вақтларда Zoom фойдаланувчиларнинг маълумотларини сақлаш борасида етарли хавфсизликни таъминлаб бера олмаётгани учун танқид қилинмоқда. Ўтган ойда Motherboard компанияси дастур фойдаланувчилар маълумотларини Facebook билан бўлишаётганини маълум қилганди.
Изоҳ (0)