Ўзбекистон фуқароларига фойдаланилган коммунал хизматлар (қаттиқ маиший чиқиндилар учун ҳам) уйларидан чиқмаган ҳолда тўловларни амалга ошириш учун Telegram ижтимоий тармоғи орқали тўлаш имконияти яратилди. Бу ҳақда МИБ матбуот хизмати хабар бермоқда.
Қайд этилишича, карантин даврида аксарият фуқаролар уйларида бўлишлари энергия ресурсларига эҳтиёжни орттиради. Тўловларнинг ўз вақтида амалга оширилмаслиги эса қарздорлик кўпайишига олиб келади. Шундан келиб чиқиб тўловларни амалга ошириш учун Telegram’да @mibuzbot боти яратилди.
Бунинг учун дастлаб @mibuzbot ботга кириб «Старт» тугмаси босиш, кейин мобил телефон рақамни улаш талаб этилади.
Кейин коммунал хизмат тури, вилоят, туман, шаҳарни танланади ҳамда коммунал хизмат тури бўйича шахсий-ҳисоб рақам киритилади, ушбу маълумотлар киритилгандан сўнг, ушбу бот абонентнинг ҳисоб-китоб маълумотларини кўрсатади.
Шундан сўнг, ҳисоблагич фотосуратини юбориш, тўловларни кузатиб бориш ва қарздорликни тўлаш мумкин бўлади.
Тўловни амалга оширишда, бот орқали электрон тўлов тизимларига кириб, пластик карточка рақами, унинг муддати, унга боғланган телефон рақами ва тўлов суммаси киритилгандан сўнг, SMS орқали келган ҳимоя кодини тасдиқлаш кифоя. Шу заҳоти тўлов амалга оширилгани маълум қилинади.
Шунингдек, қайд этилишича, бундай қулайликлар МИБнинг расмий сайтида ҳам (www.mib.uz) яратилган.
Аввалроқ карантин даврида коммунал хизматлар бўйича қарздорликни қандай кўриш мумкинлиги маълум қилинганди. Шунингдек, оқова, иссиқ сув таъминоти корхоналари томонидан кўрсатилаётган хизматларга карантин даврида тўловлар учун жарималар ва пенялар жорий этилмаслиги ҳамда қарздор истеъмолчилар бўйича судларга даъво аризалари киритилмаслиги, истеъмолчилар сув ва канализация тармоқларидан узилмаслиги билдирилган.
Ўзбекистон Экология ва атроф муҳитни муҳофаза қилиш давлат қўмитаси ходимларни ойлик иш ҳақини беришда муаммолар юзага келаётгани учун аҳолидан маиший чиқиндилар олиб чиқиб кетилгани учун тўловларни ўз вақтида амалга оширишни сўраганди.
Изоҳ (0)