Ўзбекистон Маданият вазирлиги Маданий мерос департаменти қошидаги Илмий-услубий кенгашнинг Тошкент шаҳри Бобур кўчасида жойлашган 7-уйнинг қийматини белгилаш тўғрисидаги хулосасини тасдиқлади. Бу ҳақда вазирлик матбуот хизмати хабар берди.

Фото: Маданият вазирлиги матбуот хизмати

Аввалроқ «Gazeta.uz»да ХХ аср бошида қурилган ушбу уй бузилиб кетиш хавфи остида эканлиги ҳақида мақола эълон қилинганди.

2007 йилга қадар маданий ёдгорликлар рўйхатида бўлган 7-уй Тошкент шаҳрининг собиқ ҳокими Абдуқаҳҳор Тўхтаев буйруғи билан ундан чиқариб ташланган. Орадан 11 йил ўтгач, қурувчилар аҳолини уйдан кўчиришни бошлаган. Бироқ уйда истиқомат қиладиган фуқароларнинг бир қисми уйни яна маданий мерос объектига айлантиришга муваффақ бўлган.

7 апрель куни кенгашнинг маданият вазири томонидан тасдиқланган хулосаси эълон қилинди, унда «Тошкент шаҳри Бобур кўчасидаги 7-уй меъморий ёдгорлик сифатида сақлаб қолинади» дейилган.

Ҳужжатга кўра икки қаватли ушбу уй 1930 йилларнинг иккинчи ярмида Педагогика институтининг профессор-ўқитувчилари учун қурилган.

«7-уй маълум бадиий ютуқларга эга яхлит композициянинг бир қисми бўлгани сабаб давлат аҳамиятига эга», —дейилади хулосада.

Ҳужжатда ушбу уй 2006 йили нима сабабдан маданий ёдгорликлар рўйхатидан чиқарилганига ҳам изоҳ берилган. «Бу қарор вақтинчалик эди — ўша даврда аҳоли учун ўз квартираларини хусусийлаштириб олиши учун қилинган. Бу ёдгорлик учун жуда фойдали, чунки мулк эгалари, одатда, ўз мулкларига эҳтиёткорона муносабатда бўлиб, уни таъмирлайдилар. Хусусийлаштирилгандан сўнг эсдан чиқиб кетилгани сабаб ёдгорлик қайта рўйхатга киритилмай қолиб кетган», — дейилади хулосада.