Ички ишлар вазирлиги Йўл ҳаракати хавфсизлиги бошқармаси ижтимоий тармоқларда тарқалган автомобиль суғурта полисининг қалбакилиги борасидаги видеога муносабат билдирди.
Хабарга кўра, ижтимоий тармоқларда ЙПХ ходимининг «Ўзбекинвест» суғурта компанияси қоғозини мижозларга қалбаки бераётганини таъкидлаган, зажигалкада ёқса қоғоздаги ёзувлар ўчиб кетаётгани, ҳайдовчининг автомобили жарима майдончасига йўл олиши билдирилган. Кейинчалик суғурталанувчининг жавоб тариқасидаги видеомурожаати сарлавҳали видеолар тарқаган.
Видео юзасидан олиб борилган суриштирув ишларига кўра, 2020 йилнинг 3 апрель куни Тошкент шаҳар ИИББ ЙҲХБ ЙПХ инспектори У.Абдужалилов белгиланган тақсимот асосида Тошкент шаҳар, Мирзо Улуғбек тумани, Шаҳрисабз ва Мустақиллик кўчалари чорраҳасига хизматга жалб этилган. Шу куни соат 17:15 лар атрофида Cobalt русумли транспорт воситасини ўрнатилган тартибда тўхтатган.
ЙПХ инспектори ҳайдовчининг ҳужжатларини ўрганиш жараёнида мажбурий суғурта полиси ҳақиқий эмаслиги юзасидан гумон қилган. Ҳайдовчи Д.П. ва унинг ёнида бўлган фуқаро М.У. ушбу ҳолатни уяли алоқа воситаси орқали видеотасвирга тушириб, ижтимоий тармоққа тарқатган.
Ҳолат ўрганилганда, ўша куни ЙПХ инспектори суғурта полиси ҳақиқий эмаслиги юзасидан гумон қилгани, лекин ҳайдовчига нисбатан ҳеч қандай маъмурий баённома расмийлаштирмагани ва транспорт воситасини ҳам жарима майдончасига жойламагани маълум бўлди.
Ҳозирги вақтда ушбу ҳолат юзасидан Тошкент шаҳар ИИББ ЙҲХБ масъул ходимлари томонидан хизмат текшируви ўтказилмоқда, — дейилади ИИВ ЙҲХБ ахборот хизмати хабарида.
Изоҳ (0)